وزیراعلیٰ پنجاب مریم نواز شریف کی ہدایت پر پنجاب حکومت نے عوام کو پلاسٹک سے پیدا ہونے والی مہلک بیماریوں سے تحفظ کے لیے مہم کا آغاز کردیا ہے، صوبائی حکومت نے صوبے میں غیر قانونی پلاسٹک بیگ کی تیاری، پروڈکشن، ترسیل اور خریدوفروخت پر پابندی کے لیے میکانزم پر سختی سے عملدرامد کرانے کے لیے تیاری مکمل کرلی ہے۔
پنجاب حکومت کی جانب سے جاری کی گئی ہدایات میں کہا گیا ہے کہ پلاسٹک کا استعمال کینسر اور دیگرمہلک بیماریوں کا موجب ،پلاسٹک کا استعمال ماحولیاتی آلودگی بڑھا رہا ہے۔
مزید پڑھیں
صوبائی حکومت کے مطابق صوبے میں 5 جون سے پلاسٹک کی غیرقانونی مصنوعات بنانے والی فیکٹریوں کے خلاف کریک ڈاٶن کا آغاز کیا جائے گا، ہوٹلوں، ریسٹورنٹس اوردیگرفوڈ پواٸنٹس پر گاہکوں کوپلاسٹک بیگ میں کھانا دینے پر بھی سخت پابندی ہوگی۔
پنجاب حکومت کے مطابق مذکورہ پابندی کی خلاف ورزی کرنے والے ہوٹلوں کے خلاف مکمل کریک ڈاٶن ہوگا، پلاسٹک بیگز میں گاہکوں کو کھانا فراہم کرنے والے ہوٹلز و ریستوران کے مالکان کے خلاف قانونی کاررواٸی اور بھاری جرمانے ہوں گے۔
صوبائی حکومت نے کہا ہے کہ قانون کے مطابق 75 ماٸیکرون سے کم حجم کے پولیتھین بیگز کے استعمال اور سنگل یوز پلاسٹک کے برتنوں پر مکمل پابندی ہے۔
پلاسٹک کے عدم استعمال پر عوام کے لیے ’پلاسٹک موت ہے‘، کے موضوع پر آگاہی مہم کا اغاز کیا جائے گا، پبلک سروس میسیجز سوشل میڈیا کے ذریعے واٸرل کیے جاٸیں گے، شاپنگ مالز، دفاتر، بس اسٹینڈز، پارکس، ٹرانسپورٹس، ڈاٸیوو، میٹرو بسسز اور عوامی جگہوں پر پلاسٹک کی پابندی کے حوالے سے تحریری پیغامات چسپاں کیے جاٸیں گے۔
پلاسٹک بیگز کی جگہ کاٹن بیگز یا متبادل ذراٸع کی تیاری، پروڈکشن، خریدوفروخت اوراستعمال کو فروغ دیا جائے گا۔
پنجاب حکومت نے میڈیا کے نام پیغام میں کہا ہے کہ پلاسٹک موت ہے اور اس کی زہریلی لہر سے ہم سب کو بچنے کے لیے ملکر کوشش کرنی ہوگی، میڈیا کو ’پلاسٹک موت ہے‘ کی آگاہی مہم میں اپنا حصہ ڈالنے کی درخواست ہے
پنجاب حکومت نے عوام کے نام پیغام میں کہا ہے کہ عوام پلاسٹک بیگ خریدتے وقت یاد رکھیں اپنے اور دوسروں کے لیے موت خرید رہے ہیں۔
