ماحولیاتی تحفظ کے عالمی دن کے موقع پر پنجاب حکومت نے پلاسٹک کے استعمال، پیداوار، فروخت اور تجارت پر پابندی عائد کر دی ہے، وزیراعلیٰ پنجاب مریم نواز نے پلاسٹک پر پابندی کی پالیسی کے سخت نفاذ کی ہدایت کی ہے۔
مزید پڑھیں
صوبائی حکومت نے پلاسٹک کی آلودگی کے مضر اثرات سے عوام کو آگاہ کرنے کے لیے خصوصی آگاہی مہم کا آغاز کردیا ہے، وزیر اعلیٰ مریم نواز کا کہنا ہے کہ آج نہیں سوچا تو 2050 تک خشک سالی دنیا کی 3 چوتھائی آبادی کوشدید متاثر کر سکتی ہے۔
وزیر اعلیٰ پنجاب کے مطابق ہوٹلوں اور کھانے پینے کی جگہوں پر پلاسٹک کے تھیلوں کے استعمال پر پابندی ہوگی، پلاسٹک بیگ کی جگہ ماحول دوست متبادل مثلاً کاٹن بیگ کا استعمال کیا جائے۔
ماحولیاتی تحفظ کے عالمی دن کے موقع کی مناسبت سے اپنے پیغام میں وزیراعلیٰ پنجاب مریم نواز کا کہنا تھاکہ ماحولیاتی آلودگی پاکستان سمیت دنیا بھر کے لیے چیلنج ہے اور اقوام عالم کو مل کر قدرتی ماحول پر اثرانداز ہونے والے عوامل پر قابو پانا ہوگا۔
وزیراعلیٰ پنجاب مریم نواز کے مطابق پلاسٹک کے استعمال سے ماحول اور انسانی صحت پر مضر اثرات مرتب ہو رہے ہیں۔ ’نو ٹو پلاسٹک مہم کا مقصد ماحولیاتی آلودگی کو کم کرنا اور ماحول دوست اقدامات کا فروغ ہے، عوام کرہ ارض کی حفاظت کے مشن میں ہمارا ساتھ دیں۔‘
مریم نواز کا کہنا تھا کہ ماحولیاتی آلودگی میں تیزی سے اضافے کی ایک بڑی وجہ جنگلات کی مسلسل کٹائی بھی ہے، فطرتی خوبصورتی کو محفوظ رکھنے کے لیے مل کر اقدامات کرنے کی ضرورت ہے، فوسل فیول کے استعمال میں کمی اور قابل تجدید توانائی پر انحصار بڑھانا ہوگا۔
’ماحولیاتی آلودگی کی وجہ سے کرہ ارض کی 40فیصد سطح ارض انحطاط کا شکار ہے، پنجاب حکومت کے مثبت اقدامات ماحولیات کے تحفظ کے عزائم ظاہر کرتے ہیں، ہرفرد اپنا کردار ادا کرکے نئی نسل کے ماحولیاتی مستقبل کو یقینی بنا سکتا ہے۔‘
