پاکستان تحریک انصاف (پی ٹی آئی) کے سینیئررہنما فیصل جاوید نے اسٹیبلشمنٹ کے ساتھ کسی بھی ڈیل کے امکان کو یکسرمسترد کر دیا ہے اور کہا ہے کہ اللہ کے بعد عمران خان نے رجوع کیا تو عوام کے ساتھ کریں گے، عوام کے ساتھ ہی ہماری ڈیل ہو گی۔
یہ بھی پڑھیں:عمران خان ملک میں جاری فاشزم کی روک تھام کے حوالے سے سپریم کورٹ سے پرامید ہیں، فیصل جاوید
پیر کو وی نیوز سے گفتگو کرتے ہوئے فیصل جاوید نے کہا کہ پاکستان تحریک انصاف حکومت کے ساتھ مذاکرات کے لیے پہلے سے ہی تیار ہے لیکن حکومت کے ساتھ کوئی بات چیت تبھی ہوسکتی ہے جب وہ پاکستانی جیلوں میں قید پاکستان تحریک انصاف کے کارکنوں کو رہا کرے گی۔
انہوں نے کہا کہ حکومت نے ہمارے رہنماؤں اور کارکنوں کو ناحق قید میں رکھا ہوا ہے، ہمارے کارکنوں پر پرچے کیے جا رہے ہیں، ہماری سوشل میڈیا کے محب وطن پاکستانیوں کواٹھایا جا رہا ہے، انہیں قید کیا جا رہا ہے، پھر کہہ رہے ہیں کہ پی ٹی آئی کے ساتھ مذاکرات، ایسے میں کون سے اور کیسے مذاکرات کیے جائیں؟
مزید پڑھیں:پی ٹی آئی کے روپوش رہنما فیصل جاوید منظرعام پر آگئے، قوم سے اہم اپیل
فیصل جاوید نے کہا کہ مذاکرات کے لیے پہلے نکات طے ہوتے ہیں اورپاکستان تحریک انصاف کی طرف سے نکات یہی ہیں کہ پہلے ہمیں انصاف دیا جائے پھرجیلوں میں قید ہمارے مینڈیٹ کو رہا کیا جائے۔
جماعت اسلامی پاکستان کے راولپنڈی دھرنے کی حمایت سے متعلق پوچھے گئے سوال کے جواب میں فیصل جاوید نے کہا کہ پاکستان تحریک انصاف کی تحریک جاری ہے جمعہ کو زبردست لوگ نکلیں ہیں، آگے بھی احتجاج کریں گے۔
انہوں نے کہا کہ مہنگائی، عمران خان، بشریٰ بی بی سمیت پی ٹی آئی کے ناحق قید کارکنوں کی رہائی اور ہمارے چوری کیے گئے مینڈیٹ کی واپسی کے لیے بھرپور احتجاج جاری رکھیں گے، فارم 47 نہیں فارم 45 والے اس مینڈیٹ کے اصل حقدار ہیں۔
یہ بھی پڑھیں:فیصل جاوید اور شہریار آفریدی گلے لگ کر رو پڑے، ’عمران خان نے سب کو رُلا دیا‘
اسٹیبلشمنٹ کے ساتھ مذاکرات سے متعلق پوچھے گئے سوال کے جواب میں جاوید فیصل نے کہا کہ کسی سے کوئی ڈیل نہیں ہو رہی ہے، اللہ کے بعد اگر عمران خان نے کسی سے رجوع کیا تو وہ اس ملک کے عوام ہی ہوں گے، ہم عوام کے ساتھ ڈیل ہوئی ہے اور قوم نے اپنا فیصلہ دے دیا تھا۔ ہم چاہتے ہیں کہ قوم کے فیصلے کو تسلیم کیا جائے ہماری طرف سے یہی ڈیل ہو گی۔
