چیف جسٹس قاضی فائز عیسیٰ نے بطور چیئرمین لا اینڈ جسٹس کمیشن تنازعات کے متبادل حل کے لیے کمیٹی اور ٹاسک فورس از سر نو تشکیل دے دی۔
لا اینڈ جسٹس کمیشن 22 جولائی کے نوٹیفکیشن کے مطابق جسٹس منصور علی شاہ ٹاسک فورس کے رکن نہیں رہے۔ جسٹس یحییٰ خان آفریدی کمیٹی کے سربراہ ہوں گے۔
کمیٹی ممبران میں جسٹس عائشہ ملک اور جسٹس شاہد وحید بھی شامل ہوں گے۔
یہ بھی پڑھیں: زیرالتوا مقدمات کی تعداد میں اضافہ، لا اینڈ جسٹس کمیشن نے اعدادوشمار جاری کردیے
کمیٹی کی معاونت کے لیے تنازعات کے متبادل حل کے لیے نئی ٹاسک فورس تشکیل دی گئی جس کی معاونت کمیٹی کرے گی۔
نوٹیفکیشن کے مطابق چیف جسٹس سندھ ہائیکورٹ جسٹس ہاشم کاکڑ اور سندھ ہائیکورٹ کے جسٹس یوسف علی سید ، اسلام آباد سے جسٹس میاں گل حسن، لاہور سے جسٹس جواد حسن اور پشاور سے جسٹس عتیق شاہ ٹاسک فورس کے اراکین ہوں گے۔
ڈسڑکٹ اینڈ سیشن ججز سے صدف کھوکھر، عظمیٰ فرناز،شبانہ محسود، شمس الدین سپرا اور سول جج صنم بخاری بھی ٹاسک فورس کے ممبر ہوں گے۔
اٹارنی جنرل اور وزارت قانون کے نمائندے اور تمام صوبائی ایڈوکیٹ جنرلز بھی ٹاسک فورس میں شامل ہوں گے جبکہ ایڈوکیٹ مخدوم علی خان ، فیصل نقوی اور سیکریٹری لا اینڈ جسٹس بھی کمیشن ٹاسک فورس کے اراکین ہوں گے۔
نوٹیفکیشن سیکریٹری لا اینڈ جسٹس کمیشن کی سیکریٹری کی جانب سے جاری کیا گیا تھا۔
