فرانس کے شہر پیرس میں جاری اولپمکس مقابلوں میں جیولن تھرو ایونٹ میں شریک پاکستانی ایتھلیٹ ارشد ندیم آج پاکستانی وقت کے مطابق رات 11 بج کر 25 منٹ پر جیولن تھرو کے فائنل میں 11 دیگر ایتھلیٹس سے مقابلہ کریں گے۔
گزشتہ روز جیولن تھرو کے مقابلوں میں ارشد ندیم نے سیمی فائنل جیت کر فائنل میں جگہ بنائی تھی۔ ان کی جیت کے بعد پاکستانی قوم کی نظریں جیولن تھرو ایونٹ میں شریک ارشد ندیم پر مرکوز ہیں اور ہر کوئی فائنل میں ان کی جیت کے لیے دعاگو ہے۔
یہ بھی پڑھیں: اولمپکس 2024: ارشد ندیم آج میڈل کے لیے میدان میں اتریں گے، مقابلہ کتنے بجے منعقد ہوگا؟
پاکستان کرکٹ ٹیم کے کھلاڑی بھی ارشد ندیم کے فائنل راؤنڈ میں پہنچنے پر نہایت اور پرجوش ہیں۔ کرکٹ ٹیم کے سینیئر کھلاڑیوں نے اپنے ویڈیو پیغامات میں ارشد ندیم کو فائنل میں پہنچنے پر مبارکباد پیش کی ہے اور کہا ہے کہ وہ ان کی جیت کے لیے پرامید ہیں۔
قومی ٹیسٹ ٹیم کے کپتان شان مسعود نے اپنے پیغام میں ارشد ندیم کو فائنل مرحلے کے لیے کوالیفائی کرنے پر مبارکباد پیش کرتے ہوئے کہا کہ ہماری نیک تمنائیں اور دعائیں آپ کے ساتھ ہیں۔
یہ بھی پڑھیں: پیرس اولمپکس میں پاکستان کی واحد امید ارشد ندیم کا قوم کے نام پیغام ؟
انہوں نے کہا کہ ہم بھی کافی بے چینی سے انتظار کررہے ہیں، ہمیں پوری امید ہے کہ آپ پاکستان کے لیے میڈل لے کر آئیں گے۔ انہوں نے کہا کہ ارشد ندیم کی اسپورٹس کے لیے خدمات اور کامیابیوں کے بارے میں جتنا بھی کہیں وہ کم ہوگا۔
شان مسعود نے ارشد ندیم کے لیے اپنے پیغام میں مزید کہا کہ آپ ایک رول ماڈل ہیں، ہمیں امید ہے کہ 8 اگست کو پاکستان کا پرچم بھی بلند ہوگا اور آپ میڈل کے پوڈیم پر بھی ہوں گے۔
یہ بھی پڑھیں: پیرس اولمپکس 2024: ارشد ندیم نے جیولین تھرو فائنل کے لیے کوالیفائی کرلیا
کرکٹر سعود شکیل نے اپنے پیغام میں ارشد ندیم کو اپنی اور پورے ملک کی طرف سے فائنل مرحلے میں کوالیفائی کرنے پر مبارکباد پیش کرتے ہوئے کہا کہ ہم آپ سے بہت امید رکھتے ہیں اور دعاگو ہیں کہ آپ پیرس اولمپکس میں پاکستان کے لیے گولڈ میڈل لے کر آئیں گے۔
اسٹار کرکٹر بابر اعظم نے اپنے پیغام میں ارشد ندیم کو فائنل مرحلے میں پہنچنے پر مبارکباد پیش کی اور عوام سے درخواست کی کہ وہ ارشد ندیم کی کامیابی اور گولڈ میڈل کے لیے خوب دعائیں کریں۔
Supporting our star Arshad Nadeem 🌟
Pakistan team wishes Arshad all the best ahead of the Men’s Javelin Throw final at the Paris Olympics tonight 👏 pic.twitter.com/qOqvewkRkp
— Pakistan Cricket (@TheRealPCB) August 8, 2024
فاسٹ بولر نسیم شاہ نے کہا کہ ارشد ندیم کے فائنل کے لیے کوالیفائی کرنے پر سب فخر محسوس کررہے ہیں، وہ پاکستان کے بہترین ایتھلیٹ ہیں، ہم سب کی دعائیں ان کے ساتھ ہیں کہ وہ گولڈ میڈل جیت کر آئیں۔
وکٹ کیپر اور بیٹر سرفراز احمد، فاسٹ بولر شاہین شاہ آفریدی اور کوچ عمر گل نے بھی اپنے پیغامات میں ارشد ندیم کو فائنل راؤنڈ کے لیے کوالیفائی کرنے پر مبارکباد پیش کی اور کہا کہ پورے پاکستان کی دعائیں ارشد ندیم کے ساتھ ہیں، قوم کو ان پر بھروسہ ہے اور انہیں امید ہے کہ وہ گولڈ میڈل جیت کر وطن واپس آئیں گے۔
