پیرس اولمپکس میں جیولین تھرو میں گولڈ میڈلسٹ اور عالمی ریکارڈ قائم کرنے والے ارشد ندیم کے طیارے کو پاکستان واپسی پر خصوصی واٹر کینن سلیوٹ پیش کیا گیا۔ ارشد ندیم کا جہاز ایک بج کر 25 منٹ پر لاہور ایئر پورٹ لینڈ کیا، جہاں ان کا فقید المثال استقبال کیا گیا۔
ارشد ندیم کے اہل خانہ صوبائی وزرا سمیت، واپڈا کے عہدے داروں اور دیگر محکموں سمیت ان کے مداح بڑی تعداد میں ایئرپورٹ پر موجود تھے۔ ارشد ندیم پیرس سے ترکیہ کے رستے لاہور پہنچے ہیں۔ ان کی پرواز ٹی کے 714 جیسے ہی لاہور کے علامہ اقبال ائیر پورٹ پہنچی تو رن وے پر طیارے کو خصوصی واٹر کینن سلیوٹ پیش کیا گیا۔
مزید پڑھیں:فخر پاکستان ارشد ندیم وطن پہنچ گئے، حکومتی سرپرستی میں فقیدالمثال استقبال، پھولوں کی پتیاں نچھاور
لاہور ایئرپورٹ پر مداحو ں کی بڑی تعداد کے پیش نظر ارشد ندیم کو ڈبل ڈیکر بس پر سوار کیا گیا، قومی ہیرو نے بس پر سوار ہو کر مداحوں کا شکریہ ادا کیا اور ہاتھ اُٹھا کر عوام کے نعروں اور محبتوں کا جواب دیا۔ بعد ازاں ارشد ندیم کا قافلہ ڈبل ڈیکر بس پر سوار ہو کر ایئرپورٹ سے براستہ موٹر وے میاں چنوں کی طرف روانہ ہوا۔
واضح رہے کہ ارشد ندیم نے اولمپکس ریکارڈ کے ساتھ ساتھ جیولین تھرو مقابلے میں گولڈ میڈل جیتا ہے۔ انہوں نے 92.97 میٹر تھرو کرکے نیا اولمپک ریکارڈ قائم کیا ہے۔ مینز جیولین تھرو ایونٹ کے فائنل میں ارشد ندیم نے پاکستان کو 40 سال بعد گولڈ میڈل جتوایا۔ ارشد ندیم پاکستان کی جانب سے اولمپکس کے انفرادی مقابلوں میں گولڈ میڈل جیتنے والے پہلے ایتھلیٹ ہیں۔
