احمد سلطان کیانی نے 19ویں چیف آف دی نیول اسٹاف امیچورز گالف کپ 2026 کا ٹائٹل جیت لیا۔
یہ بھی پڑھیں: اسلام آباد: پاک بحریہ کے زیر اہتمام 19واں چیف آف دی نیول اسٹاف امیچور گالف کپ شروع
تفصیلات کے مطابق احمد ظفر حیات، ایمی چن، دعا فرید راؤ اور مصطفیٰ زبیر نے بالترتیب سینئیرز، لیڈیز، لیڈیز اور جونیئرز کیٹیگریز میں ٹائٹل اپنے نام کیے۔ چیف آف دی نیول اسٹاف ایڈمرل نوید اشرف تقریب کے مہمان خصوصی تھے۔
تقریب سے خطاب کرتے ہوئے نیول چیف نے انعامات حاصل کرنے والے کھلاڑیوں کو مبارکباد پیش کی اور تمام کھلاڑیوں کی اسپورٹس مین شپ کے اعلیٰ معیار کو سراہا۔
انہوں نے اسپانسرز، میڈیا اور مارگلہ گرینز گالف کلب کی انتظامیہ کی جانب سے تعاون کی بھی تعریف کی جن کی اجتماعی کوششوں نے ایونٹ کی شاندار کامیابی کو یقینی بنایا۔
مزید پڑھیے: سنگاپور اوپن گالف چیمپیئن شپ، پاکستان کے احمد ظفر حیات نے میدان مار لیا
4 روزہ گالف کپ 22 سے 25 اکتوبر 2026 تک مارگلہ گرینز گالف کلب اسلام آباد میں منعقد ہوا۔ اس میں امیچور، سینیئرز، لیڈیز اور جونیئرز سمیت متعدد کیٹیگریز میں مقابلے منعقد ہوئے۔
چیف آف دی نیول اسٹاف امیچورز گالف کپ 2007 سے قومی گالف سرکٹ میں ایک باقاعدہ اور اہم ایونٹ ہے اور اس کا باقاعدہ انعقاد قومی سطح پر کھیلوں کی ثقافت کو فروغ دینے کے لیے پاک بحریہ کے عزم کا مظہر ہے۔
مزید پڑھیں: دن دیکھا نہ رات، مسلسل 36 گھنٹے گالف کھیل کر بنایا منفرد ریکارڈ
تقریب میں مسلح افواج کے افسران، اسپانسرز، گالفرز اور میڈیا کے اراکین سمیت مختلف معززین نے شرکت کی۔
