کھیل کے میدان میں روایتی حریف اور ذاتی زندگی میں عمدہ دوست بھارتی نیزے باز نیرج چوپڑا اور پاکستانی ایتھلیٹ ارشد ندیم نے ایک دوسرے کی زندگی پر بننے والی ممکنہ فلموں کے لیے بالی ووڈ کے 2 بہترین اداکاروں کے نام تجویز کردیے۔
یہ بھی پڑھیے: ’ارشد ندیم میرے بیٹے جیسا ہے‘ والدہ کے بیان پر بھارتی ایتھلیٹ نیرج چوپڑہ نے کیا کہا؟
حال ہی میں ختم ہونے والے پیرس اولمپکس 2024 میں ارشد ندیم نے جیولن ایونٹ میں ریکارڈ توڑ 92.97 میٹر تھرو کے ساتھ گولڈ میڈل جیت کر تاریخ رقم کی تھی جبکہ ان کے بھارتی حریف نیرج چوپڑا نے دوسرے نمبر پر آتے ہوئے چاندی کا تمغہ حاصل کیا تھا۔
دونوں کھلاڑی بھلے سے ہی میدان میں ایک دوسرے کو پیچھے چھوڑنے کے لیے سر دھڑ کی بازی لگا دیتے ہوں لیکن میدان کے باہر ان کے درمیان ایک بہت اچھی دوستی اور خلوص کا رشتہ قائم ہے۔
مزید پڑھیں: http://والدہ نیرج چوپڑا کے ارشد ندیم کو سراہنے پر نریندر مودی کا کیا ردعمل تھا؟
دونوں کھلاڑیوں نے انٹرویوز میں بھی ہمیشہ ایک دوسرے کی مسلسل تعریف کی ہے اور ایک کی والدہ دوسرے کو اپنا بیٹا ہی گردانتی ہیں اور اس کا برملا اظہار بھی کرتی ہیں۔ یاد رہے کہ نیرج کی والدہ نے اپنے بیٹے کے خلاف ارشد کی کامبیابی پر کہا تھا کہ وہ بھی میرا بیٹا ہے جبکہ ارشد کی والدہ نیرج کی محبت میں انہیں اگلے مقابلے میں فاتح دیکھنا چاہتی ہیں جس سے ممکنہ طور پر ان کا اپنا بیٹا دوسرے نمبر پر آسکتا ہے۔
اولمپیئن نیرج چوپڑا نے ایک فلم میں ارشد ندیم کا کردار نبھانے کے لیے بالی ووڈ کے بہترین اداکار اور اپنے وقت کے سپر اسٹار امیتابھ بچن کا نام تجویز کیا ہے۔
ایک انٹرویو میں جب نیرج چوپڑا سے پوچھا گیا کہ وہ ارشد ندیم کی زندگی پر بننے والی فلم میں کس کو کاسٹ کریں گے تو انہوں نے فوری طور پر کہا کہ وہ امیتابھ بچن کو چنیں گے کیوں کہ (جسمانی) قد کے لحاظ سے امیتابھ اور ارشد برابر ہیں۔
مزید پڑھیے: ارشد ندیم کے حریف بھارتی ایتھلیٹ نیرج چوپڑا کتنے اثاثوں کے مالک ہیں؟
نیرج نے مزید کہا کہ اگر ارشد ندیم کی زندگی کوئی فلم ہندوستان میں بنتی تو امتابھ بچن اپنے چھوٹے دنوں میں ارشد کا کردار ادا کر سکتے ہیں۔ گو نیرج اچھی طرح جانتے تھے کہ یہ ایک خیالی بات ہو رہی ہے لہٰذا ان کا مقصد یہ تھا کہ امیتابھ بچن اپنی جوانی میں ارشد ندیم کے کردار میں پرفیکٹ دکھائی دیتے۔
دوسری جانب جب ارشد ندیم سے بالکل ایسا ہی سوال نیرج چوپڑا کے بارے میں کیا گیا تو انہوں نے کہا کہ اگر نیرج پر کوئی فلم بنتی ہے تو اس کردار کے لیے شاہ رخ خان بہترین رہیں گے۔
