معروف پاکستانی اداکارہ جویریہ عباسی نے رواں برس مئی میں اپنی منگنی کا اعلان کیا تھا جس کے بعد ان کے دوسرے شوہر کے حوالے سے قیاس آرائیاں شروع ہوگئی تھیں۔ تاہم گزشتہ ماہ جویریہ عباسی نے انکشاف کیا تھا کہ ان کی شادی کو 3 ماہ ہوچکے ہیں اور وہ اب اپنے شوہر کے ساتھ خوش و خرم زندگی گزار رہی ہیں۔
جویریہ کا کہنا تھا کہ ان کے شوہر کاروباری شخصیت ہیں اور ان کا شوبز سے کوئی تعلق نہیں ہے۔ جویریہ نے اپنے دوسرے شوہر کے ساتھ گھومتے پھرتے کئی تصاویر سوشل میڈیا پر شیئر کیں مگر انہوں نے اس دوران اپنے شوہر کو سوشل میڈیا کی نظروں سے دور رکھا اور ان کا چہرہ آج تک کسی کو نہ دکھایا۔
یہ بھی پڑھیں: طلاق کے 15 سال بعد اداکارہ جویریہ عباسی کا دوسری شادی کا اشارہ
تاہم اب جویریہ نے اپنے دوسرے شوہر کی نقاب کشائی کردی ہے۔ حال ہی میں جویریہ عباسی نے اپنے انسٹاگرام پر شوہر کے سیلفی شیئر کی ہے جس میں انہیں اپنے شوہر کے ساتھ دیکھا جاسکتا ہے۔ جویریہ غالباً اب بھی اپنے شوہر کو دنیا کی نظروں سے دور رکھنا چاہتی ہیں، یہی وجہ ہے کہ انہوں نے اس بار بھی اپنے شوہر کے چہرے کو ایموجی سے چھپانے کی کوشش کی ہے۔
البتہ جویریہ نے اپنی پوسٹ میں اپنے شوہر کا نام اور ان کے کاروبار کے بارے میں اپنے مداحوں کو بتا دیا ہے، جس کے بعد جویریہ عباسی کی اپنے شوہر کو چھپائے رکھنے کی کوشش ’ناکام‘ ہوگئی ہے۔
جویریہ عباسی کے دوسرے شوہر کون؟
جویرہ عباسی نے اپنی ہنستی مسکراتی اس تصویر کو اپنے شوہر عدیل حیدر کو ٹیگ کیا اور انہیں سالگرہ کی مبارک باد دی ہے۔ اداکارہ کے تصویر ٹیگ کرنے کے بعد ان کے شوہر عدیل حیدر کی تفصیلات بھی سامنے آگئی ہیں۔
یہ بھی پڑھیں: انزیلا عباسی نے اداکاری کیوں چھوڑ دی؟
عدیل حیدر کے انسٹاگرام اکاؤنٹ کے مطابق، وہ ایک کاروباری شخصیت ہیں اور انہوں نے خود کو بطور فوٹوگرافر متعارف کروایا ہوا ہے جبکہ ان کے پرائیویٹ اکاؤنٹ کو 917 صارفین نے فالو کیا ہوا ہے۔ علاوہ ازیں عدیل حیدر کی محض 93 پوسٹ کے باوجود انہوں نے خود 383 لوگوں کو فالو بیک کیا ہوا ہے۔ عدیل حیدر کے اس پرائیوٹ اکاؤنٹ کو جویریہ عباسی اور ان کی بیٹی عنزیلہ عباسی سمیت ان کے دوست احباب نے فالو کیا ہوا ہے۔
واضح رہے کہ جویریہ عباسی کی پہلی شادی 1997 میں اداکار شمعون عباسی سے ہوئی تھی، شادی کے ایک سال بعد ان کے ہاں بیٹی عنزیلہ عباسی کی پیدائش ہوئی تھی۔ جویریہ عباسی اور شمعون عباسی کے درمیان سال 2009 میں طلاق ہوگئی تھی۔ والدین کی طلاق کے بعد سے عنزیلہ عباسی اپنی والدہ کے پاس ہی رہیں اور سال 2023 میں جویریہ عباسی نے اپنی بیٹی کی شادی کی۔
