مسلسل چوتھے دن فلسطین مغربی کنارے کے شہر جنین پر اسرائیلی بمباری جاری ہے اور بڑے پیمانے پر تباہی کے باعث شہر ملبے میں تبدیل ہوگیا ہے۔ وقفے وقفے سے جھڑپیں دیکھنے میں آرہی ہیں۔ شہادتوں کی تعداد 61 سے تجاوز کر گئی۔
العربیہ اور الحدث کے مطابق جنین کیمپ میں اسرائیلی فوج اور فلسطینی جنگجوؤں کے درمیان وقفے وقفے سے جھڑپیں جاری ہیں۔ کیمپ کی گلیوں کے اندر اور شہر کے متعدد علاقوں میں جھڑپیں جاری ہیں۔ چھتوں پر سنائپرز تعینات ہیں۔ شہر میں بہت زیادہ تباہی ہوئی ہے۔ خاص طور پر مشرقی محلے اور کیمپ کے اندر تباہی دیکھی جارہی ہے۔
مزید پڑھیں:’آپ ہمارے بچوں کو دفن کرنے پر تلے ہیں‘ اسرائیلی وزیراعظم کے خلاف احتجاجی کیمپ لگا دیے گئے
دوسری جانب قریباً مکمل تباہ ہوجانے والی غزہ کی پٹی میں اسرائیل نے ہفتہ کی صبح سے ہی کئی حملے شروع کر دیے۔ اسرائیلی فوج نے وسطی غزہ میں نصیرات کے مغرب میں ایک مکان کو نشانہ بنایا، جس میں ورلڈ کچن تنظیم کے ملازمین مقیم تھے۔ یہ تنظیم بے گھر افراد کو خوراک فراہم کرتی ہے۔ اس تنظیم کو اس سے قبل یکم اپریل کو ایک اسرائیلی حملے کا نشانہ بنایا گیا تھا۔ اس حملے میں تنظیم کے 7 ملازمین مارے گئے تھے۔
بمباری میں غزہ کی پٹی کے شمال میں بیت لاہیا کے قصبے میں ’انڈونیشیا ہسپتال‘ کے آس پاس، تل قلیبو کے علاقے میں ایک رہائشی اپارٹمنٹ کو بھی نشانہ بنایا گیا۔ اسرائیلی جنگی طیاروں نے غزہ شہر کے جنوب مشرق میں الزیتون محلے پر بھی 3 فضائی حملے کیے ہیں۔
مزید پڑھیں:اسرائیل کو جواب دینے کے لیے او آئی سی واضح اور جرأت مندانہ منصوبہ تیار کرے، پاکستان
7 اکتوبر 2023 سے غزہ کی پٹی پر اسرائیلی بمباری جاری ہے۔ ہر طرف آگ اور تباہی ہے۔ طبی اور خوراک کی امداد کی کمی کے درمیان لوگوں کی زندگیوں کو خطرات لاحق ہیں۔ اسرائیلی فورسز کے حملوں میں 41 ہزار سے زیادہ فلسطینی شہید ہو چکے ہیں۔
