لیلیٰ کا تعلق گلگت بلتستان کے خوبصورت علاقے اسکردو سے ہے۔ وہ پچھلے 18 سال سے روایتی کھڈی کے ہنر میں مہارت رکھتی ہیں، جو ان کے علاقے کی قدیم ثقافت کا حصہ ہے۔ یہ ہنر گلگت بتستان کے پرانے وقتوں میں ہوتا تھا جب لوگ ہاتھ سے چادر اور کپڑا بنتے تھے، تاہم وقت کے ساتھ ساتھ انہوں نے اسے جدید تقاضوں کے مطابق ڈھال لیا ہے۔
لیلیٰ اب یہی کام جدید مشینوں سے کرتی ہیں۔ مختلف اشیا تیار کرنا شروع کیں۔ اب وہ دوپٹے، چادریں، کپڑے اور دیگر اشیا تیار کرتی ہیں، جو نہ صرف ان کے لیے بلکہ علاقے کی دیگر خواتین کے لیے بھی روزگار کا ذریعہ بن چکی ہیں۔
لیلیٰ نے بتایا کہ شروع میں گلگت بلتستان رورل سپورٹ آرگنائزیشن نے تربیت دی جس کے بعد 15 سال کام کرنے کے بعد ابھی 4 برسوں سے اپنی مدد آپ کے تحت کام کررہی ہوں۔ کام میں بہت محنت شامل ہے۔ وقت گزرنے کے ساتھ اپنے ساتھ مزید خواتین کو بھی اس کام میں لگا دیا اور تربیت بھی دی۔
شروع میں انہیں بہت سی مشکلات کا سامنا کرنا پڑا کیونکہ یہ ہنر سیکھنا آسان نہ تھا لیکن لیلیٰ نے اپنی محنت اور عزم سے اس کام میں مہارت حاصل کر لی۔ آہستہ آہستہ، ان کا کام بہتر ہوتا گیا، اور مقامی مارکیٹ میں ان کی بنائی ہوئی چیزوں کی مانگ بڑھنے لگی۔
لیلیٰ کہتی ہیں کہ اب بھی سکردو انے والے سیاح میرے ہاتھ سے بنی اشیا بہت شوق سے خرید کر لے جاتی ہیں اور مہمان کو تحفہ دینے کے لیے بھی یہ شال اور دیگر اشیا خرید کر لے جاتے ہیں۔
لیلیٰ نے اپنی کامیابی کو صرف اپنی ذات تک محدود نہیں رکھا۔ انہوں نے اپنے کام کو ایک وسیع مقصد کے تحت جاری رکھا اور اپنے ہنر کو دیگر خواتین کے ساتھ بانٹنا شروع کیا۔ اب وہ دیگر خواتین کو کھڈی کا کام سکھاتی ہیں تاکہ وہ بھی مالی خودمختاری حاصل کر سکیں۔ زیادہ سے زیادہ خواتین یہ ہنر سیکھ کر اپنے گھروں کو چلانے میں خود کفیل بنیں۔
لیلیٰ اور ان جیسی خواتین کی جدوجہد سے اب اس علاقے میں روزگار کے مواقع بھی بڑھ رہے ہیں اور خواتین کی معاشرتی حیثیت بھی بہتر ہو رہی ہے۔
لیلیٰ کی بنائی ہوئی چادریں اور دوپٹے نفاست اور خوبصورتی میں باکمال ہوتے ہیں۔ مقامی سطح پر ان کی بہت مانگ ہے۔ وہ اسے معاشرے کی خدمت کا ذریعہ مانتی ہیں۔ ان کی اس جدوجہد نے نہ صرف ان کی اپنی زندگی کو بہتر بنایا ہے بلکہ علاقے کی دیگر خواتین کے لیے بھی نئی راہیں ہموار کی ہیں۔
لیلیٰ کی محنت، عزم اور خدمت کا جذبہ ان کی کامیابی کا راز ہے، اور وہ دوسروں کے لیے بھی ایک مشعلِ راہ بن چکی ہیں۔
لیلیٰ کی کہانی کے بارے میں مزید جانیے شیریں کریم کی اس ویڈیو رپورٹ میں
