راولپنڈی کی انسداد دہشتگردی عدالت میں زیر سماعت جی ایچ کیو حملہ کیس میں بانی پی ٹی آئی عمران خان اور شاہ محمود قریشی سمیت دیگر ملزمان پر فرد جرم آج بھی عائد نہ کی جاسکی۔
یہ بھی پڑھیں:جی ایچ کیو حملہ کیس: بانی پی ٹی آئی عمران خان سمیت دیگر افراد پر فردِ جرم کی کارروائی ملتوی
جی ایچ کیو حملہ کیس کی سماعت اڈیالہ جیل میں انسداد دہشت گردی کی خصوصی عدالت کے جج امجد علی شاہ نے کی، پی ٹی آئی کی قانونی ٹیم کی جانب سے عدالت میں 23 اے ٹی اے کی درخواست دائر کردی گئی۔
درخواست میں موقف اختیار کیا گیا ہے کہ انسداد دہشت گردی ایکٹ کی شق 23 کے تحت جی ایچ کیو حملہ کیس کا مقدمہ انسداد دہشت گردی عدالت کے دائرہ اختیار میں نہیں آتا، مقدمہ میں دہشت گردی کی دفعات کا اطلاق نہیں ہوتا، مقدمہ متعلقہ عدالت کو بجھوایا جائے۔
مزید پڑھیں:جی ایچ کیو حملہ کیس میں نامزد ملزمان کے بیرون ملک سفر پر پابندی عائد
عدالت نے وکلا صفائی کی جانب سے دائر حالیہ درخواست کل سماعت کے لیے مقرر کردی ہے، فریقین کل وکلا صفائی کی درخواست پر دلائل دیں گے، سانحہ 9 مئی جی ایچ کیو حملہ کیس کی سماعت کل تک ملتوی کردی گئی ہے۔
