کراچی کی مقامی عدالت نے کھمبوں پر نصب بجلی کے ٹرانسفارمر گرنے سے زخمی شہری کی جانب سے ہرجانہ طلب کرنے کے حق کو تسلیم کرتے ہوئے کے الیکٹرک کو متاثرہ شہری کو 92 لاکھ روپے ادا کرنے کا حکم دیا ہے۔
سٹی کورٹ کراچی کے سینیئر سول جج رزاق حسین نے ٹرانسفارمر گرنے سے شہری کے زخمی ہونے کے کیس میں کے الیکٹرک کے خلاف غفلت برتنے پر بڑا حکم دیتے ہوئے متاثرہ شہری عاصم امام کو ایک ماہ میں 92 لاکھ روپے ہرجانہ کی مد میں ادا کرنے کا حکم دیا ہے۔
درخواست گزار کے وکیل عثمان فاروق نے دورانِ سماعت عدالت کو بتایا کہ اورنگی ٹاؤن کے علاقہ صادق آباد میں 15 نومبر 2018ء کو کے الیکٹرک کی غفلت کے باعث بجلی کے ٹرانسفارمر گرنے کا واقعہ پیش آیا، جس میں عاصم امام بری طرح زخمی ہوگئے تھے۔
درخواست گزار کے وکیل کے مطابق نہ صرف اس حادثہ میں عاصم امام بری طرح زخمی ہوئے بلکہ آج تک ان کے جسم کے کئی حصے ناکارہ ہیں۔
وکیل عثمان فاروق نے عدالت سے کے الیکٹرک پر بھاری جرمانہ عائد کرنے کی استدعا کرتے ہوئے کہا تھا کہ متاثرہ شہری کو کم از کم ہرجانہ کی رقم ادا کی جائے تاکہ ان کی معاشی مشکلات کا ازالہ ہوسکے۔
