غربت کے خاتمے اور ماحولیاتی تبدیلیوں کے اثرات کی روک تھام کے لیے پاکستان پاورٹی ایلیویشن فنڈ نے آزاد جموں و کشمیر میں لوکل ایریا ڈویلپمنٹ پروگرام کا آغاز کردیا ہے۔
یہ بھی پڑھیں: وزیراعظم شہباز شریف نے آزاد کشمیر میں دانش اسکولز سسٹم کا سنگ بنیاد رکھ دیا
جمعرات کے روز پاکستان کے وزیراعظم یوتھ پروگرام کے چیئرمین رانا مشہود نے مظفرآباد میں لوکل ایریا ڈویلپمنٹ پروگرام کا افتتاح کیا، یہ منصوبہ آزادکشمیر کے 3 اضلاع جہلم ویلی، حویلی اور نیلم میں شروع کیا گیا ہے۔
پی پی اے ایف کے شراکتی اداروں، حمزہ ڈویلپمنٹ فاؤنڈیشن اور بیسک ایجوکیشن ریفارم اینڈ ڈویلپمنٹ فاؤنڈیشن کے تعاون سے شروع کیے گئے اس منصوبے کا مقصد آبادیوں کو ماحولیاتی تبدیلیوں سے ہم آہنگ کرنے کے لیے حکمت عملی کا حصہ بناتے ہوئے انہیں بااختیار بنانا ہے، تاکہ اس خطے میں ایک پائیدار اور خوشحال مستقبل کی بنیاد رکھی جاسکے۔
اس منصوبے کی افتتاحی تقریب میں وزیراعظم پاکستان یوتھ پروگرام کے چیئرمین رانا مشہود کے علاوہ آزادکشمیر حکومت کے وزرا، سیاسی و سماجی شخصیات نے بھی شرکت کی۔
یہ بھی پڑھیں: وزیراعظم آزاد کشمیر نے عالمی مبصرین کو ریاست کے دورے کی دعوت دیدی
اس موقع پر رانا مشہود نے کہا کہ ملک کو ترقی یافتہ بنانے کے لیے سماجی شعبے کا تعاون انتہائی ضروری ہے۔ آزادکشمیر لوکل ایریا ڈویلپمنٹ پروگرام کے آغاز سے پسماندہ علاقوں میں ترقی کے نئے دور کا آغاز ہوگا، جس کے مثبت نتائج مرتب ہوں گے۔
وزیر اطلاعات آزادکشمیر پیر مظہر سعید نے کہا کہ آزادکشمیر کے پسماندہ علاقوں کے شہریوں کے لیے یہ پراجیکٹ انتہائی اہمیت کا حامل ہے اور یہ منصوبہ ان علاقوں کی محرومیاں ختم کرنے کے لیے ایک اہم سنگِ میل ثابت ہوگا۔
مظفرآباد میں پی سی آر سی کی اسسٹنٹ ڈائریکٹر یوتھ اور والنٹیئر طاہرہ کاظمی نے وی نیوز سے گفتگو کرتے ہوئے کہا کہ اس پروجیکٹ کے ذریعے اسمارٹ ٹیکنالوجی متعارف کروائی جا رہی ہے، جس سے اس خطے کے لوگوں کو بہت فائدہ ہوگا۔
انہوں نے کہا کہ اس منصوبے میں سولر سسٹم کی تنصیب کے ساتھ ساتھ کسانوں کو جدید طریقوں سے کھیتی باڑی کی تربیت دی جائے گی، جو زرعی پیداوار میں اضافے کا باعث بنے گی۔
یہ بھی پڑھیں: ہم اپنا جہادی کلچر واپس لائیں گے، وزیراعظم آزاد کشمیر
طاہرہ کاظمی نے مزید کہا کہ اس پراجیکٹ میں زمین کے بہتر استعمال کی منصوبہ بندی اور جنگلات اگانے کے لیے تربیت بھی فراہم کی جائے گی، جو ماحولیاتی تحفظ میں مددگار ثابت ہوگی۔
انہوں نے یہ بھی کہا کہ نوجوانوں اور معذور افراد کو تربیت دی جائے گی تاکہ وہ مالی طور پر خودمختار ہوسکیں، جس سے اس خطے کی معیشت پر مثبت اثرات مرتب ہوں گے۔