اسلام آباد ہائیکورٹ نے آئندہ ہفتے کے لیے ڈیوٹی روسٹر جاری کرتے ہوئے 3 نئے ججز کو بھی ڈیوٹی روسٹر میں شامل کر لیا ہے۔
یہ بھی پڑھیں:ہائیکورٹ میں ججز کی تعنیاتی، اسلام آباد بار کونسل کا کل ہائیکورٹ اور ضلعی عدالتوں کے بائیکاٹ کا اعلان
چیف جسٹس عامرفاروق کی منظوری کے بعد اسلام آباد ہائیکورٹ کا آئندہ ہفتے کا ججز ڈیوٹی روسٹر ڈپٹی رجسٹرار جوڈیشل نے جاری کردیا ہے، نئے روسٹر کے مطابق ڈیوٹی روسٹر میں اسلام آباد ہائیکورٹ میں تبادلے کے بعد 3 ججز کو بھی شامل کیا گیا ہے جو پیر سے مقدمات کی سماعت کریں گے۔
جاری ہونے والے نئے ڈیوٹی روسٹر کے مطابق دوسرا ڈویژن بینچ نئے ججز جسٹس سرفراز ڈوگر اور جسٹس خادم حسین سومرو پر مشتمل ہوگا جبکہ جسٹس محمد آصف سنگل بینچ میں مقدمات کی سماعت کریں گے۔ اسی طرح چیف جسٹس عامر فاروق کی ہدایت پر اسپیشل ڈویژن بینچ اور لارجر بینچ بھی سماعت کے لیے دستیاب ہوگا۔
مزید پڑھیں:ماضی میں کب کب ججز کا دوسرے صوبوں سے اسلام آباد ہائیکورٹ میں تبادلہ ہوا؟
واضح رہے کہ ہفتہ کے روز سندھ، بلوچستان اور پنجاب سے 3 ججز کو تبدیل کر کے اسلام آباد ہائی کورٹ بھیج دیا گیا تھا۔
اس حوالے سے جاری نوٹیفکیشن میں بتایا گیا تھا کہ جسٹس سردار محمد سرفراز ڈوگر کا لاہور ہائیکورٹ اور جسٹس خادم حسین سومرو کا سندھ ہائیکورٹ سے اسلام آباد ہائیکورٹ میں تبادلہ کیا گیا ہے جبکہ جسٹس محمد آصف کا بلوچستان ہائیکورٹ سے اسلام آباد ہائیکورٹ میں تبادلہ ہوا۔
