23 مارچ یوم پاکستان کی مناسبت سے ایوان صدر اسلام آباد میں مرکزی تقریب منعقد ہوئی جس میں صدر مملکت آصف علی زرداری نے بطور مہمان خصوصی شرکت کی۔
اس موقع پر اپنے خطاب میں انہوں نے کہا کہ آج کا دن لاکھوں مسلمانوں کی قربانیوں کی یاد تازہ کرتا ہے جن کی قربانیوں کی بدولت پاکستان کاخواب حقیقت میں بدلا۔ انہوں نے شہدا کی قربانیوں کو خراج تحسین پیش کرتے ہوئے کہا کہ ہم نے بہت سی قربانیاں دے کر آزادی حاصل کی اور بیرونی اور اندرونی دہشت گردی کا منہ توڑ مقابلہ کیا۔
یہ بھی پڑھیے: یوم پاکستان پر ایوان صدر میں پروقار تقریب، پاک فوج کے دستوں کی سلامی
صدر آصف زرداری نے اپنے خطاب میں کہا کہ بھارت نے ہمیشہ پاکستان کو میلی آنکھ سے دیکھا ہے، فتنہ الخوارج اور دیگر دہشت گرد تنظیموں کے ناپاک عزائم ناکام بنائیں گے، ففتھ جنریشن وار فیئر ایک اہم چیلنج ہے اور نوجوان نسل میں نفرت اور مایوسی پھیلانے والے عناصر کو کسی صورت کامیاب نہیں ہونے دیں گے۔
صدر مملکت نے مقبوضہ کشمیر کے شہریوں سے اظہار یکجہتی کرتے ہوئے کہا کہ آج کے دن ہم اپنے کشمیری بہن بھائیوں کو نہیں بھولے، انشا اللہ کشمیر ایک دن ضرور آزاد ہوگا، سلامتی کونسل کی قراردادوں کے مطابق کشمیریوں کو حق خودارادیت دینا ہوگا، عالمی برادری کشمیری عوام کو اپنے مستقبل کا فیصلہ خود کرنے دے۔
صدر مملکت کا کہنا تھا کہ پاکستان کا مقصد مضبوط اور جدید اسلامی فلاحی مملکت ہے، ہمیں ایک ایسا پاکستان بنانا ہے، جو طاقتور اور ترقی یافتہ ہو۔
انہوں نے شاندار پریڈ کے انعقاد پر پاک فوج اور منتظمین کو مبارکباد بھی پیش کی۔
یہ بھی پڑھیے: سرحدوں کی حفاظت کے لیے عزم غیرمتزلزل ہے، مسلح افواج کی قوم کو یوم پاکستان پر مبارکباد
اس سال یوم پاکستان کی مرکزی تقریب اور روایتی فوجی پریڈ کا انعقاد ایوان صدر کے احاطے میں کیا گیا جس میں تینوں افواج کے چاق و چوبند دستوں نے سلامی دی جبکہ تقریب کے دوران پاک فضائیہ کے لڑاکا طیاروں نے مارچ پاسٹ کا شاندار مظاہرہ کیا۔
اس تقریب میں صدر پاکستان آصف علی زرداری کے علاوہ وزیراعظم محمد شہباز شریف سمیت دیگر سیاسی و سماجی شخصیات، عسکری قیادت اور دوست ممالک کے سفارتی نمائندوں نے شرکت کی۔
