وزیراعظم پاکستان شہباز شریف نے کہا ہے کہ دفاعی بجٹ میں اضافہ وقت کی ضرورت ہے، پاکستان نے بھارت کے 3 نہیں 4 رافیل جہاز مار گرائے۔
یہ بھی پڑھیں ملکی سیکیورٹی صورت حال: حکومت نے دفاعی بجٹ میں اضافے کا فیصلہ کرلیا
سینیئر صحافیوں سے غیررسمی گفتگو کرتے ہوئے انہوں نے کہاکہ پاکستان نے 10 مئی کو بھارت سے 1971 کی جنگ کا بدلہ لے لیا ہے۔
وزیراعظم نے کہاکہ ہم نے بھارت کو پہلگام واقعے پر شفاف تحقیقات کی پیشکش کی تھی۔ بھارت نے تحقیقات کی پیشکش قبول کرنے کے بجائے الٹا حملہ کردیا۔
شہباز شریف نے کہاکہ 10 مئی کی رات بھارتی حملے سے قبل ہی ہم جواب دینے کا فیصلہ کر چکے تھے، بھارتی رویے نے کئی ممالک کو پاکستان کے لیے نیوٹرل کیا۔
انہوں نے کہاکہ قومی سلامتی کے مشیروں کی ملاقات کے لیے پاکستان تیار ہے۔ مودی کے شکست خوردہ بیانات کا جواب دینا مناسب نہیں سمجھتے۔
وزیراعظم شہباز شریف نے کہاکہ بھارت سے کشمیر، پانی، تجارت اور دہشتگردی پر بات کرنے کے لیے تیار ہیں۔
یہ بھی پڑھیں معرکہ بنیان مرصوص: کانگریسی رہنما نے بھارت کی عبرتناک شکست تسلیم کر لی
انہوں نے کہاکہ بجٹ کے لیے آئی ایم ایف سے بات چیت کامیاب ہوگئی ہے، حکومت نے معاشی استحکام حاصل کرلیا ہے، اب معاشی ترقی کا سفر طے کریں گے۔
