اپنی شادی پر بے تحاشا پیسے خرچ کرکے لائم لائٹ میں آنے والے مقبول پاکستانی یوٹیوبر اور سوشل میڈیا کی مشہور شخصیت رجب بٹ ایک بار پھرخبروں کی زینت بنے ہوئے ہیں کیونکہ انہوں نے اپنی بھانجی کے عقیقہ کی تقریب میں دولت کی بڑھ چڑھ کر نمائش کی ہے۔
سوشل میڈیا پر مختلف ویڈیوز وائرل ہو رہی ہیں جس میں رجب بٹ اپنے خاندان کے ہمراہ اکلوتی بھانجی آیت زہرا کے عقیقہ میں شامل تھے، اس تقریب میں یوٹیوبر کی فیملی سمیت کئی دیگر دوست احباب بھی شامل تھے جو آیت زہرا پر پیسوں کی برسات کر رہے تھے۔
View this post on Instagram
ویڈیوز سوشل میڈیا پر وائرل ہوئیں تو صارفین نے انہیں خوب تنقید کا نشانہ بنایا۔ ان کا کہنا تھا کہ اگر پیسہ حلال کا ہوتا تو اس طرح نہ اڑایا جاتا جبکہ کئی صارفین کا کہنا تھا کہ یہ عقیقہ نہیں ہے اور نہ ہی سنت کا طریقہ ہے۔ محسن اکرام نے لکھا کہ دولت کی نمائش کیوں کی جا رہی ہے۔
سدرہ آرائیں لکھتی ہیں کہ کچھ لوگ اتنے ذہنی غریب ہوتے ہیں کہ ان کے پاس صرف پیسے ہی ہوتے ہیں، کئی صارفین نے دولت کی نمود و نمائش پر رجب بٹ اور ان کے خاندان کو جاہل قرار دے دیا۔
ایک صارف نے لکھا کہ جب اوقات سے زیادہ مل جائے تو یہی ہوتا ہے جبکہ کئی صارفین کا کہنا تھا کہ عقیقہ پر اڑائے جانے والے پیسے نقلی ہیں۔
واضح رہے کہ اس سے قبل یوٹیوبر رجب بٹ کی شادی کے موقع پر ان کے دوست احباب نے بے تحاشاپیسے لٹائے اور مہنگے تحائف بھی دیے گئے جن میں ایک عدد شیر کا بچہ، کلاشنکوف، گولڈ پلیٹڈ آئی فون اور ڈالرز کا گلدستہ بھی شامل تھا۔ ٹک ٹاکر کو غیر قانونی طور پر شیر کا بچہ اور لائسنس کے بغیر کلاشنکوف رکھنے پر گرفتار بھی کیا گیا تھا تاہم بعد ازاں ضمانت پر رہا کر دیاگیا۔ رجب بٹ کی شادی کی تقریب میں دولت کی نمائش پر ان کو تنقید کا نشانہ بنایا گیا تھا۔
