پنجاب کی سینئر وزیر مریم اورنگزیب نے کہا ہے کہ سالانہ ترقیاتی پروگرام 26-20025 میں ماحولیاتی خطرات سے نمٹنے کے لیے 64 فیصد بجٹ مختص کیا گیا ہے، جو ایک تاریخی قدم ہے۔
لاہور میں میڈیا سے گفتگو کرتے ہوئے مریم اورنگزیب نے بتایا کہ آئندہ مالی سال کے ترقیاتی بجٹ کا مجموعی حجم 1240 ارب روپے ہے، جس میں سے 371.739 ارب روپے ماحولیاتی خطرات میں کمی کے اقدامات کے لیے رکھے گئے ہیں۔ ان کے مطابق حکومت نے ماحولیاتی تبدیلیوں سے ہم آہنگ جدید طریقے اپنانے کے لیے 277.437 ارب روپے مختص کیے ہیں۔
مزید پڑھیں: پنجاب بجٹ اجلاس: عظمیٰ بخاری کو نازیبا اشارے کرنے پر انکوائری کا حکم
سینئر وزیر کا کہنا تھا کہ پنجاب حکومت نے موسمیاتی تبدیلی سے نمٹنے کے لیے تمام شعبوں میں مربوط حکمت عملی اپنائی ہے اور حکومتی سطح پر اجتماعی سوچ کے تحت فیصلے کیے جا رہے ہیں۔ انہوں نے کہا کہ ہم مجموعی ماحولیاتی بہتری کا ہدف حاصل کرنے کے لیے ہر شعبے میں بہتری لائیں گے۔
مریم اورنگزیب کے مطابق 65.172 ارب روپے ماحولیاتی خطرات سے نمٹنے کی استعداد بڑھانے پر خرچ کیے جائیں گے، جب کہ 269.479 ارب روپے ٹرانسپورٹ کے شعبے کے لیے مختص کیے گئے ہیں۔ عوامی آگاہی اور شعور اجاگر کرنے کے لیے بھی خاطرخواہ رقم مختص کی گئی ہے، جس کا حجم 95.285 ارب روپے بتایا گیا ہے۔
انہوں نے دعویٰ کیا کہ آئندہ مالی سال میں حکومت ہر شعبے میں ریکارڈ ترقیاتی کام کرے گی، اور ماحولیاتی چیلنجز سے نمٹنے کے لیے سنگ میل عبور کیا جائے گا۔
