محکمہ موسمیات کی جانب سے یکم جولائی سے 5 جولائی تک ملک کے بیشر علاقوں میں گرج چمک کے ساتھ بارش کی پیشگوئی کی ہے۔
محکمہ موسمیات کے مطابق 5 جولائی تک کشمیر، اسلام آباد، شمال مشرقی پنجاب، خطہ پوٹھوہار اور بالائی خیبر پختونخواہ میں تیز ہواؤں اور گرج چمک کے ساتھ بارش کا امکان ہے۔
اس دوران بعض مقاما ت پر تیزاور موسلادھاربارش بھی ہوسکتی ہے۔ پانچ جولائی تک شمال مشرقی پنجاب، خطہ پوٹھوہار اور بالائی خیبر پختونخوا میں موسلا دھار بارش کا امکان ہے۔
یہ بھی پڑھیں: پری مون سون نے گرمی کا زور توڑ دیا، موسم خوشگوار مزید بارشوں کی پیشگوئی
پنجاب میں گجرانوالہ، سیالکوٹ، ناروال، منڈی بہاوالدین اور حافظ آباد میں بھی بارش متوقع ہے، ملتان اور بھکر میں بھی گرج چمک کے ساتھ بارش کا امکان ہے۔
خیبرپختونخوا میں دیر، سوات، مالاکنڈ، باجوڑ، شانگلہ، بٹگرام، مانسہرہ، ایبٹ آباد، ہری پور اور پشاور میں بھی اس دوران گرج چمک کے ساتھ بارش کا امکان ہے۔
محکمہ موسمیات کے مطابق اس دوران سندھ میں موسم گرم اور مرطوب رہے گا۔
مری، گلیات، اسلام آباد راولپنڈی، سوات، پشاور میں طغیانی، کشمیر میں لینڈ سلائیڈنگ کا خدشہ
مری، گلیات، اسلام آباد راولپنڈی، سوات، پشاور میں طغیانی، کشمیر میں لینڈ سلائیڈنگ کا خدشہ ہے۔لاہور، گوجرانوالہ، سوات، مالاکنڈ، جہلم، چکوال اور سیالکوٹ میں بھی بارش کا امکان ہے۔
گزشتہ 24 گھنٹے میں اسلام آباد کا موسم
گزشتہ 24 گھنٹوں میں اسلام آباد کے مختلف علاقوں میں گرج چمک کے ساتھ موسلادھار بارش ہوئی، جس سے موسم خوشگوار ہوگیا ہے اور شہریوں نے سکھ کا سانس لیا ہے۔
موسلادھاربارش کے باعث گرمی اور حبس کی شدت میں واضح کمی آئی ہے جبکہ درجہ حرارت میں بھی نمایاں کمی ریکارڈ کی گئی ہے۔
یہ بھی پڑھیں: مون سون کی بارشیں جاری، اربن فلڈنگ کا خدشہ کہاں کہاں ہے؟
وفاقی دارالحکومت کے مختلف علاقوں بشمول سیکٹر جی-6، ایف-8، آئی-10، ترامڑی، بنی گالہ، بہارہ کہو، ترنول اور بلیو ایریا میں بارش ہوئی جس سے سڑکوں پر پھسلن اور معمولی ٹریفک مسائل دیکھنے میں آئے۔
محکمہ موسمیات کے مطابق آئندہ 24 گھنٹوں میں مزید بارش کا امکان ہے جس سے درجہ حرارت مزید کم ہونے کی توقع ہے۔
