تبتی بدھ بھکشوؤں کے روحانی پیشوا دلائی لامہ نے اپنی 90 ویں سالگرہ سے قبل اشارہ کیا کہ بدھ مت سے متعلق تبتی ادارہ ان کی موت کے بعد بھی جاری رہ سکتا ہے۔
یہ بھی پڑھیں: ٹیکسلا میں بدھ مت کے مقدس مقام پر عالمی امن کے لیے دعائیں
تبت سے تعلق رکھنے والے بدھ مت کے روحانی پیشوا دلائی لامہ نے کا کہنا ہے کہ صدیوں پرانا یہ ادارہ ان کی موت کے بعد بھی جاری رہ سکتا ہے۔
دلائی لامہ 6 جولائی کو 90 برس کے ہوجائیں گے۔ دعائیہ تقریبات سے خطاب کرتے ہوئے تینزن گیاتسو (دلائی لامہ) نے پیروکاروں سے خطاب کرتے ہوئے کہا کہ کوئی تو ایسا فریم ورک ہو گا جس کے اندر ہم اس کے تسلسل کے بارے میں بات کر سکتے ہیں۔
تبتی بدھ مت کے پیروکار اس بات پر یقین رکھتے ہیں کہ دلائی لامہ اس جسم کا انتخاب بھی کر سکتے ہیں جس میں وہ دوبارہ جنم لینا چاہتے ہیں۔ سنہ 1587 میں اس ادارے کے قیام کے بعد سے اب تک 14 مواقع پر ایسا ہوا ہے۔ تاہم موجودہ دلائی لامہ ماضی میں مشورہ دے چکے ہیں کہ وہ ممکنہ طور پر آخری لامہ بھی ہو سکتے ہیں۔
انہوں نے سنہ 2004 میں ٹائم میگزین کو بتایا تھا کہ دلائی لامہ کا ادارہ اور اسے جاری رکھنا چاہیے یا نہیں یہ تبتی لوگوں پر منحصر ہے۔ اگر وہ محسوس کرتے ہیں کہ اب یہ بامعنیٰ نہیں رہا تو یہ ختم ہو جائے گا اور 15ویں دلائی لامہ نہیں ہوں گے۔
مزید پڑھیے: ہمالیہ کے سائے تلے بدھ مت کی قدیم عبادت گاہ
گیاتسو سنہ 1935 میں پیدا ہوئے تھے اور انہوں نے سنہ 1940 میں دلائی لامہ کا 14واں اوتار حاصل کیا تھا۔ سنہ 1959 میں تبت کے دارالحکومت لہاسا میں چینی فوجیوں نے بغاوت کو کچل دیا تھا جس کے بعد سے وہ بھارت میں جلاوطنی کی زندگی گزار رہے ہیں۔
’دلائی لامہ کا اگلا جنم‘
چین دلائی لامہ کو ایک ایسا علیحدگی پسند تبتی مانتا ہے جو تبت پر چینی حاکمیت کو تسلیم نہیں کرتے اور جن کی وفاداریاں جلاوطنی میں تبتی حکومت کے ساتھ ہیں۔
گیاتسو اپنے پیروکاروں سے یہ مطالبہ کرتے رہے ہیں کہ وہ بیجنگ کی طرف سے تجویز کردہ کسی بھی جانشین کو مسترد کر دیں۔ انہوں نے کہا کہ دلائی لامہ کا اگلا جنم بھارت میں بھی ہو سکتا ہے اور وہ لڑکا یا لڑکی کوئی بھی ہو سکتا ہے۔
ایک طرف جب دلائی لامہ کی جانشینی کا سوال اب زیادہ سے زیادہ غیر متعلق ہوتا جا رہا ہے وہ خود اس بات پر اصرار کرتے ہیں کہ وہ ابھی ختم نہیں ہوئے ہیں۔
مزید پڑھیں: ’کارگاہ بدھا‘، گلگت بلتستان کا مقام جہاں بدھ مت کے پیروکاروں کا ہجوم ہوتا ہے
دلائی لامہ نے کہا کہ اگرچہ میں 90 سال کا ہوں لیکن جسمانی طور پر میں بہت صحت مند ہوں۔
انہوں نے کہا کہ جس وقت میں دنیا ترک کروں گا اس وقت بھی میں اپنے آپ کو دوسروں کی بھلائی کے لیے وقف کرتا رہوں گا۔
