پاکستان تحریکِ انصاف کے بانی عمران خان اور خیبرپختونخوا کے مشیر اطلاعات بیرسٹر سیف کے درمیان حالیہ ملاقات کی اندرونی تفصیلات سامنے آ گئی ہیں۔ ذرائع کے مطابق ملاقات میں سینیٹ انتخابات کے امیدواروں کے ناموں کو حتمی شکل دے دی گئی۔
یہ بھی پڑھیں: سینیٹ انتخابات میں پی ٹی آئی کی امیدوار مشعال یوسف زئی کو پارٹی کے اندر سے مخالفت کا سامنا
ذرائع کے مطابق بیرسٹر سیف نے سابق وزیراعظم کو خیبرپختونخوا کے بجٹ سے متعلق بریفنگ دی، جبکہ سینیٹ کے لیے نامزدگیوں پر بھی تفصیلی مشاورت کی گئی۔ عمران خان نے مشال یوسفزئی کو سینیٹر بنانے کی ہدایت جاری کی، جس کے تحت انہیں ثانیہ نشتر کی نشست کے لیے نامزد کر دیا گیا ہے۔
اس حوالے سے بیرسٹر سیف نے نجی ٹی وی سے گفتگو کرتے ہوئے تصدیق کی کہ بانی پی ٹی آئی عمران خان نے سینیٹ کے تمام امیدواروں کی منظوری دے دی ہے۔
یہ بھی پڑھیں: کیا جے یو آئی فرخ کھوکھر کو سینیٹ کا ٹکٹ دینے جارہی ہے؟ کامران مرتضیٰ نے بتادیا
ذرائع کے مطابق منظور شدہ فہرست میں مراد سعید، فیصل جاوید، مرزا آفریدی اور پیر نور الحق قادری جنرل نشستوں کے امیدوار ہیں، جبکہ ٹیکنوکریٹ نشست کے لیے اعظم سواتی اور خواتین کی نشست پر روبینہ ناز کا انتخاب کیا گیا ہے۔
