پنجاب کے مختلف شہروں میں طوفانی بارشوں کے نتیجے میں چھتیں گرنے اور دیگر حادثات کے باعث 17 افراد جاں بحق جبکہ متعدد زخمی ہو گئے۔
لاہور میں موسلا دھار بارش کے دوران چھتیں گرنے کے 3 مختلف واقعات میں 9 جانیں چلی گئیں۔ سب سے افسوسناک واقعہ ٹھوکر نیاز بیگ میں پیش آیا جہاں ایک ہی خاندان کی 2 خواتین، 2 بچیوں اور ایک مرد سمیت 5 افراد جان سے ہاتھ دھو بیٹھے۔
فیصل آباد میں بھی چھت گرنے سے ماں بیٹی سمیت 3 افراد جاں بحق ہوئے، جبکہ پاکپتن میں بارش کے باعث پیش آنے والے حادثات میں خاتون اور 2 بچے زندگی کی بازی ہار گئے، اور 12 افراد زخمی ہو گئے۔
مزید پڑھیں: ہرنائی میں زوردار دھماکا، 11 مزدور جاں بحق 6 شدید زخمی
شیخوپورہ اور شاہ کوٹ میں بھی چھت گرنے کے واقعات رپورٹ ہوئے، جہاں ایک، ایک شخص جاں بحق ہوا۔
وزیراعلیٰ پنجاب مریم نواز نے چھتیں گرنے سے ہونے والے جانی نقصان پر گہرے دکھ اور افسوس کا اظہار کیا ہے اور سوگوار خاندانوں سے ہمدردی کی ہے۔
پنجاب کے دیگر علاقوں راولپنڈی، اسلام آباد، جہلم، سرگودھا، اور فیصل آباد میں بھی وقفے وقفے سے بارش کا سلسلہ جاری ہے۔ عارف والا میں مسلسل بارش کے باعث گلیاں اور سڑکیں پانی سے بھر چکی ہیں، جبکہ سرگودھا میں کئی فیڈرز ٹرپ کر گئے۔
ادھر لاہور میں رات کو شدید بارش ہوئی، جہاں پانی والا تالاب کے مقام پر 171 ملی میٹر بارش ریکارڈ کی گئی، جو شہر بھر میں سب سے زیادہ ہے۔
