گورنر سندھ کامران خان ٹیسوری نے ایک تقریب میں کہا کہ بھائی واپس آرہے ہیں، وہ سب ٹھیک کر دیں گے۔
اس بیان کے بعد سب کو لگا کہ شاید یہ اشارہ الطاف حسین کی جانب ہے، لیکن ان کے حوالے سے بھی خبر گردش میں ہے کہ انہوں نے تو ایم کیو ایم ختم کر دی ہے، اور وہ اپنی خراب صحت کے ساتھ اور پاکستان کی عدالتوں میں اشتہاری ہونے کے بعد پاکستان کیسے آئیں گے؟
یہ بھی پڑھیں:گورنر سندھ کامران ٹیسوری کا الیکشن میں ووٹ چوری ہونے کا اعتراف، ویڈیو وائرل
اس حوالے سے وی نیوز نے ایم کیو ایم پاکستان اور لندن کے کچھ ذرائع سے رابطہ کیا تو ان کے اندازے کچھ اور ہیں۔
ایم کیو ایم پاکستان کے ذرائع کے مطابق کامران ٹیسوری کے بھائی والے بیان سے الطاف حسین مراد نہیں تھے، بلکہ ان کے بیان کی غلط تشریح کی گئی ہے۔
بھائی تو الطاف حسین تھے، اور اگر وہ نہیں تو پھر کون؟
اس حوالے سے مزید ذرائع سے معلوم ہوا ہے کہ ایم کیو ایم کو نئی شکل میں لانے کے لیے کوششیں جاری ہیں اور اس ’بھائی‘ سے مراد حال ہی میں عدالت سے بری ہونے والے منہاج قاضی ہیں، جن کے بارے میں کہا جاتا ہے کہ ان کا دماغ تیز چلتا ہے اور ایم کیو ایم سمجھتی ہے کہ اس جماعت کو دوبارہ زندہ کرنے کے لیے ایک نئے چہرے کی ضرورت ہے، جو شاید منہاج قاضی ہوں۔
یہ بھی پڑھیں:عاطف اسلم کے کنسرٹ روکنے پر گورنر سندھ کامران ٹیسوری نے کیوں آستینیں چڑھا لیں؟
ایم کیو ایم ذرائع کا کہنا ہے کہ آنے والے دنوں میں ایم کیو ایم پاکستان ایک نئی شکل میں نظر آئے گی۔
اس سوال کے جواب میں کہ کیا پھر سے تشدد کی سیاست شروع ہونے کا امکان ہے؟
ذرائع کا کہنا ہے کہ منہاج قاضی، جنہیں ’مولانا‘ بھی کہا جاتا ہے، کا چہرہ تشدد پر یقین نہیں رکھتا۔ ان کی واپسی کے لیے راہ ہموار کی جا رہی ہے تاکہ کراچی میں مقیم اردو بولنے والوں کا اعتماد بحال کیا جا سکے۔
دوسری جانب ایم کیو ایم لندن کے مصطفی عزیز آبادی نے وی نیوز کو بتایا کہ الطاف حسین نے پارٹی ختم نہیں کی، یہ کچھ لوگوں کی خواہش ہے جسے انہوں نے پیش کیا۔
ان کا کہنا تھا کہ ایم کیو ایم الطاف حسین کی تھی اور رہے گی، چاہے جس شکل میں بھی ہو۔
انہوں نے کامران ٹیسوری کے بیان سے متعلق کہا کہ انہیں علم نہیں کہ وہ اب بھائی کس کو کہہ رہے ہیں، لیکن ایم کیو ایم لندن، جو اصل ایم کیو ایم ہے، اس کا اس بیان سے نہ تعلق ہے اور نہ ہی وہ اس پر کچھ کہنا چاہے گی۔
