یہ بات سب جانتے ہیں کہ سگریٹ نوشی صحت کے لیے نقصان دہ ہے، مگر ماہرین کے مطابق نیند سے جاگنے کے فوراً، نہار منہ آپ سگریٹ پیتے ہیں، یہ آپ کے لیے مزید خطرات لا سکتا ہے۔
نئی تحقیق سے ثابت ہوا ہے کہ صبح سویرے سگریٹ نوشی منہ اور پھیپھڑوں کے کینسر کے امکانات کو بڑھا دیتی ہے۔
صبح سویرے سگریٹ نوشی کیوں زیادہ نقصان دہ ہے؟
تحقیق سے معلوم ہوا ہے کہ جو لوگ جاگنے کے 30 منٹ کے اندر سگریٹ پیتے ہیں، ان کے خون میں NNAL نامی خطرناک مادہ زیادہ مقدار میں پایا جاتا ہے۔ یہ مادہ تمباکو میں موجود ایک خاص سرطان پیدا کرنے والے عنصر (NNK) سے بنتا ہے۔ اس کا مطلب یہ ہے کہ اگرچہ 2 افراد ایک ہی دن میں برابر سگریٹ پیتے ہیں، لیکن صبح سویرے پینے والے کے جسم پر اس کے اثرات کہیں زیادہ خطرناک ہوتے ہیں۔
یہ بھی پڑھیے کیا موٹاپا، ذیابیطس اور سگریٹ نوشی ڈیمنشیا کی وجہ بن سکتے ہیں؟
پین اسٹیٹ یونیورسٹی کے ماہر پروفیسر اسٹیون برانسٹیٹر کے مطابق جو افراد جاگنے کے فوراً بعد سگریٹ پیتے ہیں، ان کے خون میں کینسر پیدا کرنے والے اجزاء کی سطح ان افراد سے زیادہ پائی گئی جو جاگنے کے آدھے گھنٹے بعد سگریٹ پیتے ہیں، چاہے دونوں روزانہ کتنی ہی سگریٹ کیوں نہ پیتے ہوں۔
یہ تحقیق سائنسی جریدے Cancer, Epidemiology, Biomarkers and Prevention میں شائع ہوئی۔
ماہرین کے مطابق بہت سے افراد رات بھر کے وقفے کے بعد نکوٹین کی شدید کمی کا شکار ہو جاتے ہیں۔ صبح جب وہ جاگتے ہیں تو خون میں نکوٹین کی سطح کافی گر چکی ہوتی ہے، جس کے باعث دماغ فوری طور پر سگریٹ کی طلب پیدا کرتا ہے۔ یہی وجہ ہے کہ صبح کا پہلا کش اکثر شدید نشے کی علامت سمجھا جاتا ہے۔
اس عادت سے چھٹکارے کے طریقے
اگر آپ صبح سویرے سگریٹ پینے کے عادی ہیں تو ماہرین کچھ آسان متبادل تجویز کرتے ہیں:
سگریٹ سے نجات حاصل کریں
اپنے کمرے اور گھر سے سگریٹ، لائٹر اور ایش ٹرے ہٹا دیں۔ دفتر جاتے وقت اپنے پاس سگریٹ نہ رکھیں اور ایسے لوگوں کے ساتھ سفر سے گریز کریں جو صبح سویرے سگریٹ پیتے ہیں۔
پانی پیئیں
جاگنے کے بعد سگریٹ کی بجائے ایک گلاس پانی پی لیں۔ یہ جسم کو ہائیڈریٹ کرے گا اور آہستہ آہستہ اس عادت کو ختم کرنے میں مدد دے گا۔
یہ بھی پڑھیے پاکستان میں سگریٹ نوشی کے رجحان میں غیرمعمولی اضافہ، روزانہ کتنے بچے سگریٹ نوش بنتے ہیں؟
ورزش کریں
صبح کی ورزش دماغ میں مثبت کیمیائی اجزاء (اینڈورفنز) پیدا کرتی ہے جو خوشی کا احساس دلاتے ہیں اور دن بھر صحت مند فیصلے کرنے پر ابھارتے ہیں۔
سگریٹ نوشی کے کوئی فائدے نہیں، صرف نقصانات ہیں۔ خاص طور پر صبح کے وقت سگریٹ پینا کینسر کے خطرات کو کئی گنا بڑھا دیتا ہے۔ اگر آپ صبح کا پہلا کش لیتے ہیں تو یہ اس بات کا اشارہ ہے کہ آپ کا جسم نکوٹین پر بہت زیادہ انحصار کر رہا ہے۔ بہتر ہے کہ اس عادت کو فوراً ترک کر کے صحت مند متبادل اپنائیں۔
