آسٹریلیا کی بگ بیش لیگ کی تاریخ میں پہلی مرتبہ ایک اننگز میں 2 سینچریاں اسکور ہوئیں جبکہ ایک میچ میں سب سے زیادہ چھکوں کا نیا ریکارڈ بھی قائم ہو گیا۔
جمعہ کو کھیلے گئے بگ بیش ٹی20 میچ میں برسبین ہیٹ نے شاندار کارکردگی کا مظاہرہ کرتے ہوئے پرتھ اسکارچرز کو 8 وکٹوں سے شکست دے دی اور متعدد ریکارڈ اپنے نام کر لیے۔
مزید پڑھیں:بگ بیش لیگ، آسٹریلوی بلے باز نے بابراعظم کی فارم میں واپسی کی پیشگوئی کردی
برسبین میں کھیلے گئے اس میچ میں پرتھ اسکارچرز نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 257 رنز بنائے۔ ٹیم کی جانب سے فن ایلن نے 79 جبکہ کوپر کونولی نے 77 رنز کی عمدہ اننگز کھیلی۔
View this post on Instagram
جواب میں برسبین ہیٹ نے 258 رنز کا ہدف میچ کے آخری اوور کی پانچویں گیند پر صرف 2 وکٹوں کے نقصان پر حاصل کر لیا۔ جیک ولڈر موتھ 110 رنز کے ساتھ ناقابلِ شکست رہے جبکہ میٹ رنشا نے 102 رنز کی شاندار سینچری اسکور کی۔
دونوں بلے بازوں نے 212 رنز کی تاریخی شراکت قائم کی جو بگ بیش لیگ کی سب سے بڑی پارٹنرشپ ثابت ہوئی، جبکہ لیگ کی تاریخ میں پہلی بار ایک اننگز میں 2 سینچریاں بھی دیکھنے میں آئیں۔
مزید پڑھیں:بابراعظم کی بگ بیش لیگ میں مایوس کن شروعات، سڈنی سکسرز کے لیے ڈیبیو میں صرف 2 رنز بناسکے
اس سنسنی خیز مقابلے میں مجموعی طور پر 515 رنز بنے اور ایک میچ میں سب سے زیادہ 36 چھکوں کا نیا ریکارڈ بھی قائم ہوا۔ 258 رنز کا ہدف بگ بیش لیگ کی تاریخ کا سب سے بڑا جبکہ ٹی20 کرکٹ کی تاریخ کا تیسرا بڑا کامیاب ہدف رہا۔
