خیبرپختونخوا حکومت نے کوہاٹ تا خرلاچی 192 کلومیٹر طویل نیا ریلوے ٹریک بچھانے کا فیصلہ کرلیا۔
وزیراعلیٰ خیبر پختونخوا سہیل آفریدی کی زیر صدارت صوبے میں ریلوے کے نظام کو بہتر بنانے اور جدید ٹرین سروس کے فروغ کے حوالے سے اہم اجلاس منعقد ہوا۔
مزید پڑھیں: کراچی کی تاریخ سناتا ریلوےکا قدیم پھاٹک
اجلاس میں خیبر پختونخوا حکومت اور پاکستان ریلوے کے درمیان تعاون اور اشتراکِ کار بڑھانے پر اتفاق کیا گیا۔
اجلاس میں فیصلہ کیا گیا کہ کوہاٹ تا خرلاچی 192 کلومیٹر طویل نیا ریلوے ٹریک بچھایا جائے گا، جس پر قریباً 642 ملین ڈالر کی لاگت آئے گی اور منصوبے کی تکمیل کی مدت 2 سال ہوگی۔
’اس ٹرین سروس کے ذریعے نہ صرف سفری سہولیات میں اضافہ ہوگا بلکہ تجارتی سرگرمیوں کو بھی فروغ ملے گا۔‘
وزیراعلیٰ سہیل آفریدی نے منصوبے کو وقت کی اہم ضرورت قرار دیتے ہوئے صوبے کے دیگر بڑے شہروں میں بھی ٹرین سروس شروع کرنے کی ہدایت دی اور کہا کہ ریلوے منصوبوں کے لیے واضح ٹائم لائنز کے ساتھ منصوبہ بندی کی جائے۔
اجلاس میں صوبے کے مختلف ریلوے ٹریکس پر جدید ٹرینیں چلانے اور جمرود تا لنڈی کوتل 32 کلومیٹر ٹریک پر سفاری ٹرین کے اجرا پر بھی غور کیا گیا۔
مزید براں، اجلاس میں قدیم اور تاریخی ریلوے اسٹیشنز کی بحالی، صفائی اور تزئین و آرائش، اور ٹریکس کے اطراف گرین بیلٹس کی تعمیر پر بھی تبادلہ خیال کیا گیا۔
مزید پڑھیں: شکارپور میں ریلوے ٹریک پر دھماکا، قانون نافذ کرنے والے ادارے موقع پر پہنچ گئے
وزیراعلیٰ نے کہا کہ صوبے کے عوام کے مفاد میں پاکستان ریلوے کو مکمل تعاون فراہم کیا جائے گا۔
اجلاس میں مشیر خزانہ مزمل اسلم، چیف سیکریٹری خیبر پختونخوا، سیکرٹری پاکستان ریلوے اور دیگر متعلقہ حکام بھی شریک تھے۔
