بانی پاکستان قائد اعظم محمد علی جناح کی تصویر والا پہلا کرنسی نوٹ پاکستانی تاریخ کا ایک اہم سنگ میل ہے اور یہ اسٹیٹ بینک آف پاکستان کے میوزیم میں محفوظ ہے۔
یہ بھی پڑھیں: 2025: بھارتی روپیہ ایشیا کی سب سے کمزور کرنسی قرار، مودی حکومت کی معاشی پالیسیوں پر تنقید
قائد اعظم کی تصویر والا پہلا کرنسی نوٹ 100 روپے کا تھا۔ یہ تاریخی نوٹ 24 دسمبر 1957 کو جاری کیا گیا تھا۔
سنہ 1947 میں پاکستان کے قیام کے فوراً بعد قائد اعظم کی تصویر والے نوٹ جاری نہیں ہوئے تھے۔ ابتدائی سالوں میں انڈین نوٹوں پر حکومتِ پاکستان کی مہر لگا کر کام چلایا گیا اور بعد میں جو اپنے نوٹ چھپے ان پر عمارتوں (جیسے بادشاہی مسجد) یا قدرتی مناظر کی تصاویر تھیں۔
نوٹوں پر قائد اعظم کی تصویر چھاپنے کا فیصلہ کچھ عرصے بعد ہوا اور سنہ 1957 میں پہلی بار ان کی تصویر 100 روپے کے نوٹ پر نمودار ہوئی جس نے بعد میں آنے والے تمام نوٹوں کے لیے ایک روایت قائم کر دی۔
مزید پڑھیے: کیا نشان زدہ پاکستانی کرنسی نوٹ قابل قبول نہیں رہے؟
یہ نایاب اور تاریخی نوٹ کراچی میں واقع اسٹیٹ بینک میوزیم اینڈ آرٹ گیلری کے کرنسی سیکشن میں نمائش کے لیے موجود ہے۔ اس میوزیم میں پاکستان کی کرنسی کی مکمل تاریخ بشمول وہ پہلے سکے اور نوٹ جو قیام پاکستان کے فورا بعد استعمال ہوئے دیکھے جا سکتے ہیں۔
مزید پڑھیں: کیا قلم کی لکھائی، نشانات والے کرنسی نوٹ منسوخ ہونے والے ہیں؟
اس نوٹ کے درمیان میں قائد اعظم محمد علی جناح کی جناح کیپ اور سوٹ میں ملبوس تصویر موجود ہے اسے پاکستان سیکیورٹی پرنٹنگ کارپوریشن نے تیار کیا تھا۔ اس میں قائد اعظم کی تصویر کا واٹر مارک بھی شامل تھا جو اسے جعلسازی سے محفوظ رکھتا تھا۔
