صدرِ متحدہ عرب امارات شیخ محمد بن زاید النہیان کے پاکستان کے پہلے سرکاری دورے کے موقع پر حکومتِ پاکستان کی جانب سے ایک خصوصی استقبالی نغمہ جاری کر دیا گیا ہے۔
استقبالی نغمے میں صدرِ متحدہ عرب امارات کی پاکستان آمد کے مناظر، ان کے شاندار استقبال اور وزیراعظم پاکستان محمد شہباز شریف سے گرمجوش مصافحہ اور گلے ملنے کے دل کو چھو لینے والے لمحات شامل کیے گئے ہیں۔
یہ بھی پڑھیے: متحدہ عرب امارات کے صدر شیخ محمد بن زاید النہیان پاکستان پہنچ گئے
نغمے میں بچوں کی جانب سے شیخ محمد بن زاید النہیان کو پھول پیش کرنے کے خوبصورت مناظر بھی دکھائے گئے ہیں، جو پاکستانی عوام کی جانب سے محبت اور احترام کی علامت ہیں۔
نغمے کے بول ’اہلاً و سہلاً، مرحبا‘ پر مشتمل ہیں، جو عرب روایت کے مطابق مہمان کے لیے خیرمقدم اور عزت و تکریم کے جذبات کی ترجمانی کرتے ہیں۔ یہ الفاظ پاکستان کے عوام کی طرف سے صدرِ متحدہ عرب امارات کے لیے خلوص اور خیرسگالی کے جذبات کی عکاسی کرتے ہیں۔
یہ استقبالی نغمہ پاکستان اور متحدہ عرب امارات کے درمیان دیرینہ دوستی، برادرانہ تعلقات اور عوامی سطح پر باہمی محبت و احترام کو اجاگر کرتا ہے۔ نغمے کے ذریعے دونوں ممالک کے مابین مضبوط سفارتی، معاشی اور سماجی روابط کو بھی نمایاں کیا گیا ہے۔
یہ بھی پڑھیے: متحدہ عرب امارات کے صدر کا دورۂ پاکستان: تعلقات میں نئی پیشرفت کی امید
حکومتی حلقوں کے مطابق یہ نغمہ اس عزم کی علامت ہے کہ پاکستان اور متحدہ عرب امارات آئندہ بھی باہمی تعاون، احترام اور اعتماد کی بنیاد پر اپنے تعلقات کو مزید مضبوط بناتے رہیں گے۔
