اسلام آباد ہائیکورٹ میں صحافی سمیع ابراہیم کی بازیابی کے لیے درخواست پر سماعت جاری ہے، چیف جسٹس اسلام آباد ہائیکورٹ جسٹس عامر فاروق کیس کی سماعت کر رہے ہیں۔
چیف جسٹس عامر فاروق نے کیس کی سماعت کرتے ہوئے استفسار کیا، کیا ایس ایچ او آبپارہ آئے ہیں؟ جہاں سے لاپتہ ہوئے کیا اس کے قریب کوئی سی سی ٹی وی کیمرہ نہیں؟
ایس ایچ او آبپارہ نے عدالت کو بتایا کہ سمیع ابراہیم کے لاپتہ ہونے کا مقدمہ تھانہ آبپارہ میں درج کر لیا گیا ہے، سی سی ٹی وی کیمرے چیک کر لیتے ہیں۔
اسٹیٹ کونسل نے اپنے بیان میں کہا کہ ابھی بیانات قلم بند ہو رہے ہیں کارروائی آگے بڑھائیں گے، پولیس اور ایف آئی اے کے پاس ابھی تک سمیع ابراہیم کے خلاف کوئی مقدمہ نہیں ہے۔
ڈپٹی اٹارنی جنرل کا کہنا تھا کہ وزارت داخلہ سے میری بات نہیں ہو سکی جس پر عدالت نے برہمی کا اظہار کرتے ہوئے کہا کہ صبح سے آپ یہاں بیٹھے ہیں یہ کوئی طریقہ تو نہیں ہے۔
وزارت دفاع کے نمائندے نے بھی اپنے بیان میں کہا کہ کل شام کو پٹیشن کی کاپی ملی کچھ وقت دے دیں جواب دے دیں گے، پیر تک کا وقت مل جائے تو ہم رپورٹ جمع کرا دیں گے۔
عدالت نے کیس کی سماعت کچھ دیر کے لیے ملتوی کر دی۔
