صدر مملکت آصف علی زرداری سے پاکستان پیپلزپارٹی (پی پی پی) آزاد کشمیر کے رہنماؤں کی ملاقات اختتام پذیر ہوگئی جس میں آزاد کشمیر کی تازہ سیاسی صورتحال اور اہم آئینی امور پر تبادلہ خیال کیا گیا۔
مزید پڑھیں: کون ہوگا صدر آزاد کشمیر؟ فیصلہ آج متوقع
وفد نے صدر مملکت آصف زرداری سے پارٹی معاملات پر رہنمائی طلب کی اور آئندہ اقدامات پر مشاورت کی۔
ملاقات میں مرحوم بیرسٹر سلطان محمود سابق صدر آزاد جموں و کشمیر کی مغفرت کے لیے فاتحہ خوانی بھی کی گئی۔
آصف زرداری نے بھارتی غیر قانونی تسلط میں مقیم کشمیری عوام کے تحفظ اور ان کے حقِ خودارادیت کے لیے قومی یکجہتی اور پختہ موقف پر زور دیا۔
ذرائع کا کہنا ہے کہ اجلاس میں آزاد کشمیر کے نئے صدر کے انتخاب کے حوالے سے مشاورت کو حتمی شکل دے دی گئی ہے، جبکہ پاکستان پیپلزپارٹی نے واضح کیا ہے کہ وہ صدر آزاد کشمیر کے منصب کے لیے اپنا امیدوار میدان میں اتارے گی۔
مزید برآں پیپلزپارٹی نے آزاد کشمیر قانون ساز اسمبلی کے ڈپٹی اسپیکر کے خلاف تحریک عدم اعتماد پیش کرنے کا بھی فیصلہ کیا ہے۔
سابق وزیراعظم آزاد کشمیر تنویر الیاس نے کہاکہ قانون ساز اسمبلی کے ڈپٹی اسپیکر کا عہدہ ہماری جماعت کے پاس ہوگا۔
واضح رہے کہ صدر آزاد کشمیر بیرسٹر سلطان محمود کا حال ہی میں انتقال ہوگیا ہے، جس کے بعد آئینی طور پر 30 روز کے اندر نئے صدر کا انتخاب ہونا ہے۔
ڈپٹی اسپیکر کے خلاف عدم اعتماد عوامی ایکشن کمیٹی کے ساتھ معاہدے کا حصہ ہے، معاہدے کے مطابق مہاجرین اراکین اسمبلی کو کوئی عہدہ نہیں دیا جا سکتا۔
