سندھ کے سینیئر وزیر شرجیل میمن کا کہنا ہے کہ سانحہ گل پلازا میں بلڈر کے ساتھ ساتھ انتظامیہ کی بھی کوتاہی سامنے آئی ہے۔
یہ بھی پڑھیں: سانحہ گل پلازہ کیس کی سماعت میں اہم پیشرفت، گواہوں کے بیانات قلمبند
ان کے مطابق متعلقہ انتظامیہ کو 2 مرتبہ خبردار کیا گیا لیکن اس نے وارننگ پر سنجیدگی سے عمل نہیں کیا۔
سینیئر وزیر نے کہا کہ ابتدائی معلومات کے مطابق اس واقعے میں بلڈر کی سنگین غفلت بھی سامنے آئی ہے جس کی مکمل چھان بین کی جا رہی ہے۔
مزید پڑھیے: گل پلازہ آتشزدگی کیس: جسٹس آغا فیصل کی سربراہی میں انکوائری کمیشن قائم
ان کا کہنا تھا کہ واقعے کی تحقیقات کے لیے قائم جوڈیشل کمیشن کام کر رہا ہے اور اس کی سفارشات پر مکمل اور سختی سے عملدرآمد کیا جائے گا۔
’ سانحات سے گریز کے لیے عمارتوں کا آڈٹ ہوگا‘
شرجیل میمن نے مزید کہا کہ آئندہ ایسے سانحات سے بچنے کے لیے تمام عمارتوں کا باقاعدہ آڈٹ یقینی بنایا جائے گا۔
انہوں نے خبردار کیا کہ جن عمارتوں کا آڈٹ نہیں کرایا جائے گا ان کو سیل کر دیا جائے گا تاکہ شہریوں کی جان و مال کا تحفظ یقینی بنایا جا سکے۔
مزید پڑھیں: سانحہ گل پلازہ کی تحقیقات کے لیے جوڈیشل کمیشن کا قیام، نوٹیفکیشن جاری
واضح رہے کہ 17 جنوری 2026 کو کراچی کے ایم اے جناح روڈ پر واقع گل پلازا میں لگنے والی آگ نے 70 سے زائد افراد کی جان لے لی تھی۔
