پاکستان تحریک انصاف نے رہنما عالیہ حمزہ ملک کی گرفتاری پر شدید ردعمل دیتے ہوئے اسے سیاسی انتقام اور بنیادی حقوق کی خلاف ورزی قرار دیا ہے۔
پاکستان تحریک انصاف نے اپنی رہنما عالیہ حمزہ ملک کی گرفتاری پر سخت ردعمل دیتے ہوئے اسے بزدلانہ اقدام قرار دیا ہے۔ پارٹی کے مطابق عالیہ حمزہ کو ایک بار پھر 9 مئی سے متعلق ’جعلی اور بے بنیاد‘ مقدمات میں نشانہ بنایا جا رہا ہے، جبکہ وہ پہلے ہی ایک کیس میں 5 سال کی سزا کا سامنا کر رہی ہیں اور دیگر مقدمات بھی زیر سماعت ہیں۔
پی ٹی آئی کے مرکزی میڈیا ڈیپارٹمنٹ کی جانب سے جاری بیان میں الزام عائد کیا گیا کہ پولیس نے غیر قانونی طور پر عالیہ حمزہ کے گھر پر چھاپہ مارا، مرکزی گیٹ توڑا اور گھر میں توڑ پھوڑ کی۔ بیان کے مطابق اس کارروائی کے دوران چادر و چار دیواری کا تقدس پامال کیا گیا اور گھر میں موجود کمسن بچیوں کو بھی ہراساں کیا گیا۔
یہ بھی پڑھیں پی ٹی آئی پنجاب کی چیف آرگنائزر عالیہ حمزہ جہلم جیل منتقل
پارٹی کا کہنا ہے کہ اب تک یہ واضح نہیں کیا گیا کہ عالیہ حمزہ کو کہاں منتقل کیا گیا ہے، جسے بنیادی انسانی حقوق اور قانونی تقاضوں کی سنگین خلاف ورزی قرار دیا جا رہا ہے۔
تحریک انصاف نے مزید کہا کہ 9 مئی کے واقعات کے بعد خواتین کے ساتھ روا رکھے جانے والے سلوک پر شدید تحفظات ہیں اور اسے ناقابل قبول قرار دیا گیا ہے۔
پارٹی کے مطابق ریاستی طاقت کے استعمال سے خواتین کو دبانے کی پالیسی ملک کو مزید بحران کی طرف لے جا رہی ہے۔
بیان میں کہا گیا ہے کہ پارٹی اپنی خواتین کارکنان کی گرفتاریوں اور ان پر ہونے والے مبینہ مظالم کے خلاف بھرپور احتجاج جاری رکھے گی اور ہر فورم پر آواز بلند کی جائے گی۔
