وزیرِ اعظم محمد شہباز شریف کی زیر صدارت رہائشی شعبے میں سرمایہ کاری، کم لاگت گھروں کی فراہمی اور شعبے میں روزگار کے مواقع بڑھانے کے حوالے سے جائزہ اجلاس ہوا۔ وزیرِ اعظم نے کہا کہ اپنا گھر ہر شہری کا حق ہے اور اس مقصد کے لیے آسان شرائط پر قرضوں کی فراہمی حکومت کی اولین ترجیح ہے۔
وزیرِ اعظم نے رہائشی شعبے میں وسیع سرمایہ کاری کی استعداد پر زور دیتے ہوئے کہا کہ سرمایہ کاری کے فروغ کے لیے حائل رکاوٹیں دور کی جائیں گی اور بیرونی سرمایہ کاروں و سمندر پار مقیم پاکستانیوں کے حقوق کا تحفظ یقینی بنایا جائے گا۔
مزید پڑھیں: اپنا گھر بچوں کے نام کرنا زندگی کی سب سے بڑی غلطی تھی، گلوکارہ ترنم ناز کا اعتراف
انہوں نے کہا کہ تعمیرات کے شعبے میں سرمایہ کاری معیشت کو مستحکم کرنے کے ساتھ ساتھ لاکھوں روزگار کے مواقع پیدا کرے گی۔
اجلاس میں متعلقہ حکام کو ہدایت کی گئی کہ شعبے میں سرمایہ کاری کے فروغ کے لیے قابل عمل حکمت عملی مرتب کی جائے اور اس میں تمام پبلک و پرائیوٹ سیکٹر اسٹیک ہولڈرز بشمول صوبائی حکومتیں، آزاد جموں و کشمیر اور گلگت بلتستان کو شامل کیا جائے۔
وزیرِ اعظم محمد شہباز شریف کی زیر صدارت رہائشی شعبے میں سرمایہ کاری کے فروغ کیلئے اقدامات، کم لاگت گھروں کی فراہمی اور شعبے میں روزگار کے اضافے پر جائزہ اجلاس
اپنا گھر ہر شہری کا حق ہے، اس حوالے سے آسان شرائط پر قرضوں کی فراہمی حکومت کی اولین ترجیح ہے. وزیرِ اعظم@AmirSaeedAbbasi pic.twitter.com/8ZERyKzWQP— Media Talk (@mediatalk922) March 26, 2026
اجلاس کو ٹاسک فورس اور ورکنگ گروپس کی تجاویز پر بریفنگ دی گئی اور منظور شدہ اقدامات پر عملدرآمد کی پیشرفت سے آگاہ کیا گیا۔
وزیرِ اعظم نے خصوصی ہدایت دی کہ بیرونی سرمایہ کاروں اور سمندرپار پاکستانیوں کی سرمایہ کاری کے لیے فوری اقدامات اٹھائے جائیں تاکہ رہائشی تعمیراتی منصوبوں میں اضافہ، معاشی سرگرمیوں کا فروغ اور روزگار کے مواقع پیدا ہوں۔
اجلاس کو بتایا گیا کہ شعبے کی قانونی اصلاحات حتمی مراحل میں ہیں، کم لاگت رہائشی منصوبوں کے لیے قرضوں کا نظام نافذ ہو چکا ہے اور آئندہ بینکوں کو اہداف دیے جائیں گے۔
مزید پڑھیں:’اپنی چھت اپنا گھر اسکیم‘ کے تحت قرضوں کی فراہمی کا حجم بڑھا دیا گیا
مزید بتایا گیا کہ ملک میں مارگیج فنانس کے پورے ایکو سسٹم کی تیاری تیزی سے جاری ہے اور ڈویلپر لیڈ فنانسنگ کے لیے جامع نظام بھی ترتیب دیا جا رہا ہے۔ وزیرِ اعظم نے ہدایت کی کہ تمام اقدامات کو جلد حتمی شکل دے کر عملی جامہ پہنایا جائے۔
اجلاس میں اعظم نذیر تارڑ، احد خان چیمہ، محمد اورنگزیب، میاں ریاض حسین پیرزادہ، وزیرِ مملکت بلال اظہر کیانی، اٹارنی جنرل منصور اعوان، گورنر اسٹیٹ بینک جمیل احمد، چاروں صوبوں، گلگت بلتستان اور آزاد جموں و کشمیر کے چیف سیکریٹریز، نجی شعبے کے ماہرین اور متعلقہ اعلیٰ حکام نے شرکت کی۔
