اسلام آباد میں روٹی اور نان کی سرکاری قیمتوں پر عمل درآمد یقینی بنانے کے لیے ضلعی انتظامیہ نے کریک ڈاؤن تیز کر دیا، متعدد تندوروں کے خلاف کارروائیاں عمل میں لائی گئیں۔
ڈپٹی کمشنر اسلام آباد عرفان میمن کے مطابق اسسٹنٹ کمشنرز نے شہر بھر میں 183 تندوروں کی انسپکشن کی، جس کے دوران مہنگی روٹی فروخت کرنے پر 11 تندور سیل جبکہ 47 افراد کو گرفتار کیا گیا۔
یہ بھی پڑھیے: کوئٹہ کے مقبول ترین روایتی کلچوں کا سفر تندور کی دھیمی آنچ سے دلوں تک
ضلعی انتظامیہ کا کہنا ہے کہ حکومت کی جانب سے روٹی کی قیمت 20 روپے جبکہ نان کی زیادہ سے زیادہ قیمت 25 روپے مقرر کی گئی ہے، اور اس سے زائد قیمت وصول کرنے والوں کے خلاف بلا امتیاز کارروائی جاری رہے گی۔
ڈی سی اسلام آباد عرفان میمن نے شہریوں سے اپیل کی ہے کہ وہ مہنگی روٹی یا نان فروخت کرنے والے تندوروں کی نشاندہی کریں تاکہ فوری کارروائی کی جا سکے۔
انہوں نے بتایا کہ شہری ضلعی انتظامیہ کے کنٹرول روم پر شکایات درج کرا سکتے ہیں، جبکہ حکام کا کہنا ہے کہ عوام کو حکومتی ریلیف کی فراہمی ہر صورت یقینی بنائی جائے گی۔
