موجودہ دور میں بڑی تعداد میں صارفین یوٹیوب کو اسمارٹ ٹی وی پر دیکھنا پسند کرتے ہیں، اب یوٹیوب نے ٹی وی ایپ کے لیے ایک نیا اور کارآمد فیچر متعارف کرا دیا ہے جو ویڈیوز دیکھنے کے تجربے کو مزید جدید بنا دے گا۔
یہ بھی پڑھیں: ماہرین کا گوگل پر زور: بچوں کے لیے یوٹیوب پر اے آئی ویڈیوز بند کریں
اسمارٹ ٹی ویز کے لیے یوٹیوب ایپ میں شامل کیے گئے اس نئے فیچر Ask کے ذریعے صارفین ویڈیو دیکھتے ہوئے براہِ راست آرٹیفیشل انٹیلی جنس (اے آئی) اسسٹنٹ سے بات چیت کر سکیں گے۔
یہ فیچر موبائل ڈیوائسز میں پہلے ہی دستیاب تھا، تاہم اب اسے ٹی وی ایپ کا حصہ بنا دیا گیا ہے تاکہ بڑی اسکرین پر بھی انٹرایکٹو تجربہ حاصل کیا جاسکے۔
یہ بھی پڑھیں: یوٹیوب کا نیا ڈیٹیکشن ٹول، تخلیق کاروں کو ڈیپ فیکس سے بچائے گا
اس فیچر کو استعمال کرنے کے لیے صارفین یوٹیوب ایپ میں ویڈیو چلانے کے دوران ریموٹ کے اپ یا ڈاؤن ایرو بٹن کو دبائیں، جس سے ویڈیو کی تفصیلات سامنے آئیں گی۔ وہاں موجود فور پوائنٹ اسٹار آئیکن Ask بٹن ہوگا، جس پر کلک کر کے آن اسکرین مائیکرو فون کے ذریعے اے آئی اسسٹنٹ سے سوال پوچھا جاسکتا ہے۔
اگر کسی ٹی وی میں مائیکرو فون کی سہولت موجود نہ ہو تو صارفین تجویز کردہ پروموٹس کے ذریعے بھی اے آئی اسسٹنٹ استعمال کر سکیں گے، جو دیکھے جانے والی ویڈیو کے مطابق دکھائے جائیں گے۔
یہ بھی پڑھیں: پنجاب حکومت اپنے یو ٹیوب چینل سے بیانیے کی جنگ جیت پائے گی؟
یہ فیچر ابتدائی طور پر 2024 میں یوٹیوب پریمیئم صارفین کے لیے متعارف کرایا گیا تھا جبکہ 2025 میں اسے عام صارفین کے لیے بھی دستیاب کر دیا گیا۔ اب اسے اسمارٹ ٹی وی ایپ میں شامل کیا گیا ہے۔
فیچر استعمال کرنے کے لیے یوٹیوب اکاؤنٹ سے سائن اِن ہونا ضروری ہوگا۔ فی الحال یہ محدود زبانوں اور مخصوص خطوں میں دستیاب ہے، تاہم کمپنی کے مطابق اسے مرحلہ وار دنیا بھر کے صارفین تک پہنچایا جائے گا۔
