جنگ بندی کے اعلان کے ساتھ ہی فضائی آپریشنز کی بحالی کا سلسلہ شروع ہو گیا ہے، جس سے مسافروں اور ایئرلائنز نے سکھ کا سانس لیا ہے۔
مشرق وسطیٰ کے اہم ممالک بشمول عراق، شام، کویت اور قطر نے اپنی فضائی حدود پروازوں کے لیے دوبارہ کھول دی ہیں۔ ان ممالک کی فضائی حدود بند ہونے کی وجہ سے پروازوں کا شیڈول شدید متاثر تھا، تاہم اب بحالی کے بعد بین الاقوامی روٹس پر ٹریفک دوبارہ شروع ہوگئی ہے۔
یہ بھی پڑھیں: مشرق وسطیٰ کشیدگی: پی آئی اے نے قطر، بحرین، کویت اور دبئی کے لیے فضائی آپریشن معطل کردیا
پاکستان کے بڑے شہروں سے خلیجی ممالک کے لیے پروازوں کی روانگی تیزی سے جاری ہے، کراچی سے مشرق وسطیٰ کے مختلف شہروں کے لیے سب سے زیادہ یعنی 18 پروازیں روانہ ہوئیں، جس سے ایئرپورٹ پر مسافروں کا غیر معمولی رش دیکھنے میں آیا۔
لاہور سے دبئی، ابوظہبی، شارجہ، بحرین، کویت اور دوحہ کے لیے 9 پروازیں اپنی منزلوں کی جانب روانہ ہوچکی ہیں۔ وفاقی دارالحکومت کے ایئرپورٹ سے بھی خلیجی ممالک کے لیے 8 پروازوں نے اڑان بھری۔
یہ بھی پڑھیں: پی آئی اے نے متحدہ عرب امارات کے لیے اپنا فضائی آپریشن کیوں معطل کیا؟
ایئرپورٹ ذرائع کا کہنا ہے کہ پروازوں کی معطلی کے باعث ہزاروں مسافر پھنسے ہوئے تھے، جنہیں اب ترجیحی بنیادوں پر اپنی منزل تک پہنچایا جا رہا ہے۔ ایئر لائنز نے اپنے شیڈول کو دوبارہ ترتیب دینا شروع کر دیا ہے تاکہ تعطل کا شکار ہونے والے آپریشنز کو جلد از جلد مکمل کیا جاسکے۔
