ابن سینا یونیورسٹی سے وابستہ محمد میڈیکل کالج میں تیسرے سال کی طالبہ فہمیدہ لغاری نے مبینہ طور پر اپنے والد کے پستول سے خود کو گولی مار کر زندگی کا خاتمہ کر لیا۔
اس افسوسناک واقعے کے بعد سندھ حکومت نے ایک پروفیسر کی جانب سے مبینہ ہراسانی کے الزامات کی تحقیقات کے لیے اعلیٰ سطح کی انکوائری کا حکم دے دیا ہے۔
اہلِ خانہ کے مطابق فہمیدہ لغاری مبینہ طور پر ایک فیکلٹی ممبر کی جانب سے ہراسانی کے باعث شدید ذہنی دباؤ کا شکار تھیں، جو گزشتہ روز اس سانحے کی سبب بنا۔
یہ بھی پڑھیں: ایف آئی اے کمپوزٹ سرکل میرپور خاص کی بڑی کارروائی، بی آئی ایس پی فنڈز میں خردبرد کرنے والا گروہ گرفتار
واقعے پر سندھ حکومت نے سخت ردعمل دیتے ہوئے وزیر داخلہ ضیا الحسن لنجار کی ہدایت پر فوری کارروائی شروع کی۔
ان کی ہدایت پر ڈی آئی جی میرپورخاص نے ایک اعلیٰ سطحی تحقیقاتی کمیٹی تشکیل دے دی ہے، جسے واقعے کے تمام پہلوؤں کا جائزہ لینے کا ٹاسک دیا گیا ہے۔
حکام کے مطابق کمیٹی کو 10 دن میں رپورٹ پیش کرنے کی ہدایت دی گئی ہے۔ کمیٹی میں ایس ایس پی میرپورخاص سید فدا حسین شاہ، ایس پی ہیڈکوارٹرز آفتاب حسین تالپور اور ایس پی سٹی قرۃالعین شامل ہیں۔
مزید پڑھیں: سندھ میں جعلی میٹرک سرٹیفکیٹ اسکینڈل پر تحقیقاتی کمیٹی قائم
سرکاری نوٹیفکیشن کے مطابق کمیٹی ہراسانی کے الزامات، ادارہ جاتی ذمہ داری اور ممکنہ مجرمانہ غفلت سمیت تمام پہلوؤں کی جامع تحقیقات کرے گی۔
اگر متوفیہ کی جانب سے کوئی آڈیو یا تحریری پیغام چھوڑا گیا ہو تو اس کا فورینزک اور تجزیاتی جائزہ بھی لیا جائے گا۔
حکام کا کہنا ہے کہ انکوائری صرف انفرادی ذمہ داری تک محدود نہیں ہوگی بلکہ ادارے کے اندر انتظامی اور نظامی خامیوں کا بھی جائزہ لیا جائے گا۔
مزید پڑھیں: ڈاکٹر شاہنواز قتل کیس میں میڈیکو لیگل آفیسر میرپورخاص سے گرفتار
نوٹیفکیشن میں مزید کہا گیا ہے کہ ذمہ دار افراد یا اداروں کے خلاف قانونی اور محکمانہ کارروائی کی سفارشات بھی پیش کی جائیں گی۔
جبکہ تحقیقات کو شفاف، مکمل اور غیر جانبدار بنانے کی ہدایت دی گئی ہے۔
دوسری جانب سوشل میڈیا پر کالج کے مالک سے منسوب ایک بیان میں ہراسانی کے الزامات کو مسترد کرتے ہوئے واقعے کو ذاتی سانحہ قرار دیا گیا ہے۔
مزید پڑھیں: آئی جی سندھ کی زیر صدارت اجلاس، فیس لیس ای چالان کے نفاذ سے متعلق اہم فیصلے
کہا گیا ہے کہ طالبہ نے اپنی زندگی میں کوئی باضابطہ شکایت درج نہیں کرائی تھی۔ بیان میں یہ بھی دعویٰ کیا گیا کہ ادارہ ایک محفوظ تعلیمی ماحول فراہم کرتا ہے۔
تاہم اہلِ خانہ نے اس مؤقف کو مسترد کرتے ہوئے کہا ہے کہ طالبہ ایک فیکلٹی ممبر کے رویے کے باعث ذہنی دباؤ کا شکار تھیں۔
پولیس کا کہنا ہے کہ مزید کارروائی تحقیقاتی کمیٹی کی رپورٹ کی روشنی میں کی جائے گی۔
