عالمی بینک نے اپنی تازہ رپورٹ میں خبردار کیا ہے کہ مشرق وسطیٰ میں جاری کشیدگی کے اثرات پاکستان کی معیشت پر بھی نمایاں طور پر مرتب ہو رہے ہیں۔
پاکستان سمیت خطے کی معاشی صورتحال پر مرتب کی گئی رپورٹ کے مطابق تیل و گیس کی عالمی قیمتوں میں اضافے نے مہنگائی کے دباؤ کو مزید بڑھا دیا ہے، جس سے معاشی استحکام کو خطرات لاحق ہیں۔
رپورٹ میں کہا گیا ہے کہ پاکستان کی معاشی شرح نمو رواں مالی سال میں حکومتی ہدف 4.2 فیصد کے مقابلے میں کم رہنے کا امکان ہے، جو کم ہو کر تقریباً 3 فیصد تک محدود رہ سکتی ہے۔
یہ بھی پڑھیں: عالمی بینک پاکستان کو پاور سیکٹر کے لیے 38 کروڑ ڈالر قرضہ دے گا
جبکہ اس سے قبل یہی تخمینہ 3.4 فیصد لگایا گیا تھا، گزشتہ مالی سال کے دوران جی ڈی پی کی شرح نمو 3.1 فیصد ریکارڈ کی گئی تھی۔
مہنگائی کے حوالے سے عالمی بینک نے پیشگوئی کی ہے کہ 2026 میں افراطِ زر بڑھ کر 7.4 فیصد تک پہنچ سکتا ہے۔
اسی طرح کرنٹ اکاؤنٹ، جو پہلے سرپلس میں تھا، دوبارہ خسارے میں جا سکتا ہے اور مالی سال 2026 میں یہ خسارہ جی ڈی پی کے 1.2 فیصد تک پہنچنے کا امکان ہے۔۔
مزید پڑھیں: عالمی بینک نے غربت کا پیمانہ بدل دیا، پاکستان میں کتنا کمانے والے غریب کہلائیں گے؟
تاہم رپورٹ میں یہ بھی کہا گیا ہے کہ مالی خسارہ کم ہو کر 4.3 فیصد رہنے کی توقع ہے، جو حکومتی مالی نظم و ضبط کی عکاسی کرتا ہے۔
دوسری جانب خلیجی ممالک سے ترسیلات زر میں کمی کا خدشہ ظاہر کیا گیا ہے، جبکہ سیاحت اور غیر ملکی سرمایہ کاری پر بھی منفی اثرات پڑنے کا امکان ہے۔
پاکستان اسٹاک ایکسچینج میں حالیہ دنوں کے دوران نمایاں مندی بھی رپورٹ کا حصہ ہے، جسے معاشی غیر یقینی صورتحال کا مظہر قرار دیا گیا ہے۔
مزید پڑھیں: عالمی بینک نے پاکستان کی ترقی میں بطور ایک اہم شراکت دار کلیدی کردار ادا کیا، وزیراعظم
توانائی کی بڑھتی ہوئی قیمتوں کو معیشت کے لیے ایک بڑا خطرہ قرار دیا گیا ہے۔
رپورٹ میں حکومتی سطح پر شوگر سیکٹر میں اصلاحات کا بھی ذکر کیا گیا ہے، جن کے تحت چینی کی قیمتوں اور برآمدات پر حکومتی کنٹرول ختم کرنے اورکسانوں کو گنے کی کاشت میں مکمل آزادی دینے کا اعلان کیا گیا ہے۔
ان اقدامات کو طویل المدتی بنیادوں پر مارکیٹ کی بہتری کے لیے اہم قرار دیا جا رہا ہے۔
