پاکستان نے خطے میں امن کے قیام کے لیے اہم سفارتی کردار ادا کرتے ہوئے امریکا اور ایران کے درمیان جاری کشیدگی کو کم کرنے اور مذاکراتی عمل کو بحال کرنے میں کلیدی کردار ادا کیا ہے، جسے عالمی سطح پر سراہا جا رہا ہے۔
پاکستان کی جانب سے امن کے لیے کی جانے والی سفارتی کوششوں کے نتیجے میں امریکا اور ایران کے درمیان مذاکراتی عمل دوبارہ شروع ہو گیا ہے۔ ذرائع کے مطابق 28 فروری کو تعطل کا شکار ہونے والا یہ عمل اب بحال ہو چکا ہے، تاہم دونوں ممالک کے درمیان اختلافات اب بھی گہرے ہیں اور ان کے حل میں وقت درکار ہوگا۔
یہ بھی پڑھیں:پائیدار امن کے لیے امریکا ایران ڈائیلاگ میں سہولت کاری جاری رکھیں گے، اسحاق ڈار
سفارتی ذرائع کا کہنا ہے کہ ماضی میں بھی ایسے مذاکرات کئی برسوں تک جاری رہے، اس لیے کسی ایک نشست میں حتمی معاہدے کی توقع نہیں کی جا سکتی۔ تاہم یہ ایک مثبت پیش رفت ہے کہ فریقین دوبارہ مذاکرات کی میز پر آ گئے ہیں۔
ذرائع کے مطابق سب سے بڑا چیلنج جاری جنگ کو روکنا تھا، جو شدت اختیار کر چکی تھی، لیکن پاکستان نے مؤثر سفارتی کوششوں کے ذریعے جنگ بندی ممکن بنائی، جس پر عالمی برادری نے اطمینان کا اظہار کرتے ہوئے پاکستان کے کردار کو سراہا۔
پاکستان نے ایک ثالث کے طور پر دونوں مخالف فریقین کو مذاکرات کی میز پر لانے میں اپنا کردار ادا کیا، جبکہ مستقل اور قابل قبول حل تلاش کرنا متعلقہ ممالک کی ذمہ داری ہے۔
امریکی نائب صدر نے بھی پاکستان کے کردار کو تسلیم کرتے ہوئے مذاکرات کے انعقاد اور میزبانی کو سراہا۔ امریکی نائب صدر جے ڈی وینس کے مطابق امریکا اپنی حتمی پیشکش ایران کے سامنے رکھ چکا ہے اور اب اس کے ردعمل کا انتظار ہے، جس سے ظاہر ہوتا ہے کہ مذاکراتی عمل ابھی جاری ہے۔
یہ بھی پڑھیں:فون کالز کی سفارتی مہم: امریکا ایران جنگ بندی تک شہباز شریف اور اسحاق ڈار کی رابطہ کاری کا سلسلہ
ذرائع کا کہنا ہے کہ جنگ بندی تاحال برقرار ہے اور آئندہ چند دن انتہائی اہم ہیں۔ امکان ظاہر کیا جا رہا ہے کہ جنگ دوبارہ شروع نہیں ہوگی اور دونوں ممالک بات چیت کا سلسلہ جاری رکھیں گے۔
تجزیہ کاروں کے مطابق شدید کشیدگی اور جنگی ماحول میں پاکستان نے نہ صرف صورتحال کو معمول پر لانے میں کردار ادا کیا بلکہ دنیا کو یہ پیغام بھی دیا کہ پائیدار امن صرف مکالمے اور باہمی سمجھوتے کے ذریعے ہی ممکن ہے۔
