گوگل فار ڈیویلپرز نے وزارتِ انفارمیشن ٹیکنالوجی و ٹیلی کام، ٹیلی نار اور انووِسٹا کے اشتراک سے اے آئی سیکھو 2026 پروگرام شروع کرنے کا اعلان کیا ہے۔ اس ملک گیر اقدام کا مقصد پاکستان کے نوجوانوں اور ڈویلپرز کو جدید مصنوعی ذہانت کی مہارتیں مفت فراہم کرنا ہے۔
مزید پڑھیں: انٹرنیٹ کا ستیاناس کیوں کر دیا؟، ’یہ بات آئی ٹی منسٹر شزہ فاطمہ بھی نہیں جانتیں‘
اس پروگرام کے تحت پہلی بار وائب کوڈنگ متعارف کروائی جا رہی ہے، جس کے ذریعے شرکا سادہ زبان میں ہدایات دے کر موبائل ایپلی کیشنز اور کھیل تیار کر سکیں گے، بغیر پیچیدہ پروگرامنگ زبان استعمال کیے۔ اس مقصد کے لیے جدید ڈیجیٹل پلیٹ فارمز استعمال کیے جائیں گے جو مصنوعی ذہانت کی مدد سے کام کرتے ہیں۔
وفاقی وزیر برائے آئی ٹی شزہ فاطمہ نے کہا کہ حکومت ملک کو روایتی خدماتی معیشت سے نکال کر مصنوعی ذہانت پر مبنی نظام کی طرف لے جانا چاہتی ہے، تاکہ نوجوان عالمی سطح پر مؤثر انداز میں مقابلہ کر سکیں۔
پروگرام 2 مراحل پر مشتمل ہوگا۔ پہلے مرحلے میں آن لائن مقابلہ ہوگا جس میں شرکا کو مصنوعی ذہانت کی بنیادی تربیت دی جائے گی، جبکہ دوسرے مرحلے میں کراچی، لاہور اور اسلام آباد میں عملی مقابلے منعقد ہوں گے جہاں منتخب امیدوار اپنی صلاحیتوں کا مظاہرہ کریں گے۔ اس مقابلے کے لیے 25 لاکھ روپے کے انعامات بھی رکھے گئے ہیں۔
مزید پڑھیں:پاکستان میں انٹرنیٹ اسپیڈ کم ہے، شزہ فاطمہ نے فری لانسرز کو ہونے والے نقصان کا اعتراف بھی کرلیا
یہ پروگرام پاکستان کے نوجوانوں کو جدید ٹیکنالوجی کے میدان میں آگے بڑھانے اور مستقبل کے تقاضوں کے مطابق تیار کرنے کی ایک اہم کوشش قرار دیا جا رہا ہے۔
