امریکا اور ایران کے درمیان مذاکرات کا دوسرا مرحلہ پاکستان میں ہوگا، معاہدہ ہوجانے کے امکانات روشن ہیں، وائٹ ہاؤس

وائٹ ہاؤس کا کہنا ہے کہ امریکا اور ایران کے درمیان امن مذاکرات کے دوسرے مرحلے کے لیے پاکستان میں بات چیت پر غور کیا جا رہا ہے اور کسی معاہدے تک پہنچنے کے امکانات روشن ہیں۔

یہ بھی پڑھیں: آبنائے ہرمز کی ناکہ بندی شروع کردی،امریکا بلیک میلنگ قبول نہیں کرے گا: ڈونلڈ ٹرمپ

وائٹ ہاؤس کی پریس سیکریٹری کیرولین لیویٹ نے صحافیوں کو بریفنگ دیتے ہوئے بتایا کہ اس حوالے سے بات چیت جاری ہے اور امریکا کو معاہدے کے امکانات کے بارے میں مثبت توقعات ہیں۔

انہوں نے کہا کہغالب امکان ہے کہ آئندہ مذاکرات کا اگلا دور اسلام آباد میں منعقد ہوگا۔

انہوں نے جنگ بندی میں توسیع کے لیے امریکا کی جانب سے کسی درخواست سے متعلق خبروں کو مسترد کرتے ہوئے انہیں غلط رپورٹنگ قرار دیا اور کہا کہ اس وقت ایسی کوئی بات درست نہیں ہے۔

کیرولین لیویٹ کا کہنا تھا کہ امریکا ان مذاکرات میں مسلسل مصروف ہے اور نائب صدر و صدر کی حالیہ گفتگو سے بھی واضح ہے کہ ایران کے ساتھ بات چیت تعمیری اور نتیجہ خیز رہی ہے۔

ترجمان وائٹ ہاؤس نے اس موقعے پر پاکستان اور اس کی قیادت کے کردار کو سراہتے ہوئے کہا کہ پاکستان نے اس عمل میں ایک بہترین ثالث کا کردار ادا کیا ہے اور امریکا اس کی کوششوں اور دوستی کو قدر کی نگاہ سے دیکھتا ہے۔

مزید پڑھیے: وزیراعظم کے 3ممالک کے دورے، ڈونلڈ ٹرمپ کی فیلڈ مارشل اور شہباز شریف کی بھرپور تعریف

انہوں نے مزید کہا کہ اگرچہ کئی ممالک نے اس عمل میں مدد کی پیشکش کی تاہم صدر ڈونلڈ ٹرمپ کے نزدیک پاکستان کے ذریعے رابطے کو جاری اور مؤثر بنانا زیادہ اہم ہے اس لیے مذاکرات کا سلسلہ اسی چینل کے تحت آگے بڑھایا جا رہا ہے۔

آبنائے ہرمز کھولنے پر چین خوش، ایران کو ہتھیار نہ دینے کا وعدہ کرلیا، صدرٹرمپ کا دعویٰ

قبل ازیں مریکی صدر ڈونلڈ ٹرمپ نے بدھ کے روز دعویٰ کیا ہے کہ چین اس بات پر بہت خوش ہے کہ وہ آبنائے ہرمز کو مستقل طور پر کھول رہے ہیں۔۔

انہوں نے مزید دعویٰ کیا کہ چین نے ایران کو ہتھیار فراہم نہ کرنے پر اتفاق کیا ہے۔

سوشل میڈیا پر اپنے بیان میں ٹرمپ نے کہا کہ وہ یہ اقدام نہ صرف چین بلکہ پوری دنیا کے مفاد میں کر رہے ہیں اور یہ صورتحال دوبارہ کبھی پیدا نہیں ہوگی۔

امریکی صدر ڈونلڈ ٹرمپ نے بدھ کے روز دعویٰ کیا ہے کہ چین اس بات پر بہت خوش ہے کہ وہ آبنائے ہرمز کو مستقل طور پر کھول رہے ہیں۔۔

سوشل میڈیا پر اپنے بیان میں ٹرمپ نے کہا کہ وہ یہ اقدام نہ صرف چین بلکہ پوری دنیا کے مفاد میں کر رہے ہیں اور یہ صورتحال دوبارہ کبھی پیدا نہیں ہوگی۔

انہوں نے مزید دعویٰ کیا کہ چین نے ایران کو ہتھیار فراہم نہ کرنے پر اتفاق کیا ہے۔

ٹرمپ ایران کے ساتھ وسیع تر سمجھوتے کی کوشش کر رہے ہیں، جے ڈی وینس

امریکی نائب صدر جے ڈی وینس کا کہنا ہے کہ صدر ڈونلڈ ٹرمپ ایران کے ساتھ محدود نہیں بلکہ ایک وسیع تر اور جامع معاہدے کے لیے کوشاں ہیں۔

جارجیا کے ایک پروگرام میں خطاب کرتے ہوئے وینس نے جاری مذاکرات کو ایک وسیع حکمت عملی کا حصہ قرار دیا جو ایک نازک جنگ بندی پر مبنی ہے جو تقریباً ایک ہفتے سے جاری ہے۔

انہوں نے کہا کہ یہ خوش آئند بات ہے کہ امریکا و ایران کے درمیان جنگ بندی 6 یا 7 دن سے برقرار ہے۔

وینس نے کہا کہ ٹرمپ کا مقصد چھوٹا موٹا معاہدہ کرنا نہیں ہے بلکہ وہ ایک جامع اور عظیم معاہدہ چاہتے ہیں۔

انہوں نے مزید کہا کہ ٹرمپ جو ایران کو پیشکش کر رہے ہیں وہ بہت سادہ ہے اگر آپ ایک نارمل ملک کی طرح سلوک کریں گے تو ہم بھی آپ کے ساتھ اقتصادی طور پر ایک نارمل ملک کی طرح سلوک کریں گے۔

جے ڈی وینس کی فیلڈ مارشل سید عاصم منیر کی تعریف

دریں اثنا امریکی نائب صدر جے ڈی وینس نے وزیراعظم شہباز شریف اور چیف آف آرمی اسٹاف فیلڈ مارشل سید عاصم منیر کی تعریف کی جنہوں نے امریکا اور ایران کے درمیان مذاکرات میں اہم کردار ادا کیا۔

فاکس نیوز کو دیے گئے ایک انٹرویو میں انہوں نے دونوں رہنماؤں کو غیر معمولی میزبان اور ریاستی حکمت عملی کے حامل قرار دیا اور کہا کہ مجھے فیلڈ مارشل آصف منیر اور پاکستان کے وزیراعظم شہباز شریف کو بہت سراہنا چاہیے۔

ان کا کہنا تھا کہ دونوں غیر معمولی میزبان تھے اور انہوں نے ایران اور امریکا کے درمیان طویل عرصے بعد ہونے والے مذاکرات میں مدد فراہم کرنے میں حقیقی ریاستی حکمت عملی دکھائی۔

ایران کے خلاف جنگ ختم ہونے والی ہے، ٹرمپ

قبل ازیں امریکی صدر ڈونلڈ ٹرمپ نے ایران کے خلاف جاری جنگ کو اختتام کے قریب قرار دیتے ہوئے عندیہ دیا ہے کہ جلد ہی امن مذاکرات دوبارہ شروع ہو سکتے ہیں، تاہم ساتھ ہی انہوں نے خبردار کیا کہ امریکا کی کارروائیاں ابھی مکمل طور پر ختم نہیں ہوئیں۔

More tomorrow @MorningsMaria @FoxBusiness pic.twitter.com/6sROcqLQG5

— Maria Bartiromo (@MariaBartiromo) April 15, 2026

ایک انٹرویو میں، جو پروگرام ’مارننگز وِد ماریہ‘ میں نشر کیا جائے گا، صدر ٹرمپ نے کہا ’میرا خیال ہے کہ جنگ تقریباً ختم ہونے والی ہے، میں اسے اختتام کے بہت قریب سمجھتا ہوں۔‘ یہ انٹرویو ماریہ بارٹی رومو کے ساتھ کیا گیا۔

صدر ٹرمپ کا یہ بیان ایسے وقت سامنے آیا ہے جب اطلاعات کے مطابق امریکا اور ایران کے درمیان مذاکرات، جو گزشتہ ہفتے پاکستان میں تعطل کا شکار ہو گئے تھے، جمعرات کو دوبارہ شروع ہونے کا امکان ہے۔

پیر کے روز امریکا نے ایرانی بندرگاہوں کی مکمل بحری ناکہ بندی نافذ کر دی، جو تنازع میں ایک نئی شدت کا اشارہ ہے، خاص طور پر اس کے بعد جب امریکا گزشتہ ہفتے ایران پر بمباری روکنے پر آمادہ ہوا تھا۔

دوسری جانب، فاکس نیوز کی میزبان ماریہ بارتی رومو کے مطابق صدر ٹرمپ نے انہیں بتایا کہ امریکا اور اسرائیل کی ایران کے ساتھ جنگ ختم ہو چکی ہے، جو ان کے اس مؤقف سے کسی حد تک متصادم دکھائی دیتا ہے جس میں وہ ایران کے شرائط نہ ماننے پر جنگ دوبارہ شروع کرنے کی دھمکی دیتے رہے ہیں۔

صدر ٹرمپ نے ایک بار پھر کہا کہ اگر امریکا نے ایران کے خلاف کارروائی نہ کی ہوتی تو آج ایران جوہری ہتھیار کا حامل ہوتا، اور اس صورت میں عالمی طاقتوں کو ایران کے سامنے جھکنا پڑتا۔

انہوں نے مزید کہا کہ جنگ جلد ختم ہو سکتی ہے، تاہم امریکا کی کارروائیاں ابھی مکمل نہیں ہوئیں اور آئندہ صورتحال کا انحصار ایران کے رویے پر ہوگا۔

اگرچہ صدر ٹرمپ نے جنگ کے خاتمے کے قریب ہونے کی بات کی، تاہم انہوں نے واضح کیا کہ امریکا کی کارروائیاں ابھی مکمل نہیں ہوئیں۔ ان کا کہنا تھا کہ اگر امریکا اس مرحلے پر پیچھے ہٹ جائے تو ایران کو اپنی تباہ شدہ صورتحال سے نکلنے میں 20 سال لگ سکتے ہیں۔

انہوں نے مزید کہا ’ہم ابھی ختم نہیں ہوئے، دیکھتے ہیں کیا ہوتا ہے، میرا خیال ہے کہ وہ معاہدہ کرنے کے لیے بے حد بے چین ہیں۔‘

یاد رہے کہ امریکا کے صدر ڈونلڈ ٹرمپ نے عندیہ دیا ہے کہ وہ یا ان کی ٹیم ایران سے مذاکرات کے دوسرے دور کے لیے آئندہ 2 روز میں اسلام آباد جاسکتے ہیں۔

میڈیا سے گفتگو کرتے ہوئے صدر ٹرمپ نے کہا کہ امریکا اور ایران کے درمیان آئندہ مذاکرات دوبارہ اسلام آباد میں ہونے کا زیادہ امکان ہے اور اس کی بڑی وجہ  پاکستان کے فیلڈ مارشل سید عاصم منیر کا کردار ہے جو لائق تحسین ہے۔

ڈونلڈ ٹرمپ نے کہا کہ آئندہ 2 دنوں میں اس حوالے سے اہم پیشرفت ہو سکتی ہے اس لیے مذاکرات کے لیے اسلام آباد جانے کا امکان زیادہ ہے۔

انہوں نے مزید کہا کہ جب کوئی ملک اس معاملے میں براہ راست شامل ہی نہیں تو مذاکرات کسی اور جگہ کیوں کیے جائیں اس لیے اسلام آباد میں بات چیت زیادہ مناسب ہو سکتی ہے۔

امریکا اور ایران کے مذاکرات کار اس ہفتے دوبارہ اسلام آباد پہنچ سکتے ہیں تاکہ جنگ کے خاتمے سے متعلق بات چیت دوبارہ شروع کی جا سکے۔

گزشتہ ہفتے کے اختتام پر پاکستان میں امریکی نائب صدر جے ڈی وینس اور وائٹ ہاؤس کے اعلیٰ حکام نے ایرانی نمائندوں کے ساتھ تہران کے جوہری پروگرام اور افزودگی کے منصوبوں پر مذاکرات کیے۔

اگرچہ ان مذاکرات میں کوئی بڑی پیش رفت نہیں ہوئی، تاہم نائب صدر وینس کے مطابق ’کافی پیش رفت‘ ضرور ہوئی ہے اور اب آئندہ صورتحال کا دارومدار ایران کے فیصلوں پر ہے۔ ان کا کہنا تھا ’گیند اب مکمل طور پر ان کے کورٹ میں ہے۔‘

یہ جنگ 28 فروری کو اس وقت شروع ہوئی جب امریکا اور اسرائیل نے ایران کے خلاف مشترکہ حملے کیے، جن میں ایران کی قیادت اور عسکری ڈھانچے کو شدید نقصان پہنچا۔ صدر ٹرمپ متعدد بار دعویٰ کر چکے ہیں کہ امریکی افواج نے ایران کی عسکری صلاحیتوں کو ’تباہ‘ کر دیا ہے۔

اس تنازع میں 13 امریکی فوجی اہلکاروں سمیت مشرقِ وسطیٰ میں ہزاروں افراد ہلاک ہو چکے ہیں۔

صدر ٹرمپ نے اس جنگ میں امریکی شمولیت کا دفاع کرتے ہوئے کہا کہ ایران کو جوہری ہتھیار حاصل کرنے سے روکنا ضروری تھا۔ ان کے بقول، ’اگر ہم ایسا نہ کرتے تو آج ایران کے پاس جوہری ہتھیار ہوتا۔‘

تاہم اقوام متحدہ کے جوہری نگران ادارے انٹرنیشنل اٹامک انرجی ایجنسی کا کہنا ہے کہ جنگ شروع ہونے سے قبل ایران کی جانب سے جوہری ہتھیار بنانے کے شواہد موجود نہیں تھے۔