وفاقی وزیرِ داخلہ محسن نقوی نے کراچی سے عراق کے درمیان فیری سروس کے قیام کے لیے فزیبلٹی پلان تیار کرنے کی ہدایت جاری کر دی ہے، جس کا مقصد زائرین کو سفری سہولت فراہم کرنا ہے۔
یہ ہدایات انہوں نے پاکستان کوسٹ گارڈز ہیڈکوارٹرز کے دورے کے دوران ایک اجلاس کی صدارت کرتے ہوئے دیں، جہاں آپریشنل تیاریوں اور تربیتی امور کا جائزہ لیا گیا۔
یہ بھی پڑھیے: انٹرنیشنل فیری سروس کے لیے کمپنی کو لائسنس جاری، سروس کا آغاز کہاں سے ہو گا؟
اجلاس میں حکام نے بریفنگ دیتے ہوئے بتایا کہ گزشتہ ایک سال کے دوران 14 ہزار کلوگرام سے زائد منشیات برآمد کی گئیں جن کی مالیت 8 ارب روپے سے زیادہ ہے۔ وزیرِ داخلہ نے اسمگلنگ اور منشیات کی اسمگلنگ میں ملوث نیٹ ورکس کے خلاف کارروائیاں مزید تیز کرنے کی ہدایت دیتے ہوئے کہا کہ اس سلسلے میں مستقل اور مؤثر اقدامات ضروری ہیں۔
محسن نقوی نے کہا کہ کوسٹ گارڈز زمینی اور سمندری حدود میں سیکیورٹی برقرار رکھنے میں اہم کردار ادا کرتے ہیں، خصوصاً ہنگامی حالات میں ان کی ذمہ داریاں مزید بڑھ جاتی ہیں۔ انہوں نے فورس کی استعداد کار بڑھانے کے لیے حکومتی تعاون جاری رکھنے کی یقین دہانی بھی کرائی۔
دورے کے دوران وزیرِ داخلہ نے پسنی سیف سٹی منصوبے پر پیش رفت کا بھی جائزہ لیا اور متعلقہ حکام کو اس منصوبے کو جلد مکمل کرنے کی ہدایت کی۔
