بھارتی اداکار اکشے کمار نے انکشاف کیا ہے کہ ان کے بیٹے کو فلم بھول بھلیاں دیکھنے کے بعد اداکارہ ودیا بالن سے اس قدر خوف محسوس ہوا کہ وہ تقریباً چھ سال تک ان سے ملنے سے گریز کرتا رہا۔
اکشے کمار ان دنوں اپنی آنے والی فلم بھوت بنگلہ کی تشہیر میں مصروف ہیں جو اس جمعہ کو سینما گھروں میں ریلیز ہوگی۔ ایک پروموشنل تقریب کے دوران گفتگو کرتے ہوئے انہوں نے اپنی 2007 کی مشہور فلم بھول بھلیاں سے جڑا ایک واقعہ شیئر کیا اور بتایا کہ اس فلم نے ان کے بیٹے پر گہرا اثر چھوڑا تھا۔
یہ بھی پڑھیں: 25 کروڑ کے مقدمے کے بعد پریش راول کا اکشے کمار سے تعلقات پر حیران کن بیان
اکشے کمار کے مطابق ان کا بیٹا فلم میں ودیا بالن کے ’منجولیکا‘ والے کردار سے اتنا متاثر ہوا کہ وہ انہیں حقیقت میں بھی اسی کردار کی طرح سمجھنے لگا۔ اداکار نے بتایا کہ جب بھی ودیا بالن ان کے گھر آتیں تو ان کا بیٹا ملنے سے انکار کرتا اور ان کی آنکھوں میں دیکھنے سے بھی گریز کرتا تھا۔
اکشے کمار نے کہا کہ انہیں اپنے بیٹے کو بارہا سمجھانا پڑا کہ ودیا بالن دراصل ایک عام اور اچھی انسان ہیں اور ان کا فلمی کردار صرف اداکاری کا حصہ ہے تاہم بچے کے ذہن سے یہ خوف فوری طور پر ختم نہ ہو سکا۔ اداکار کے مطابق یہ کیفیت تقریباً چھ سال تک جاری رہی جس کے بعد آہستہ آہستہ آراو کا خوف کم ہوا۔
یہ بھی پڑھیں: ’یہ ناقابلِ قبول ہے‘، اکشے کمار کی بھارت میں نسل پرستی کے واقعات کی سخت مذمت
واضح رہے کہ اکشے کمار ان دنوں اپنی نئی فلم بھوت بنگلہ کی تشہیر کر رہے ہیں جسے وہ اپنی پچھلی ہارر کامیڈی بھول بھلیاں سے مختلف قرار دیتے ہیں۔ انہوں نے بتایا کہ نئی فلم ایک فیملی اور بچوں کے لیے موزوں ہارر فینٹسی ہے جبکہ بھول بھلیا ایک نفسیاتی تھرلر تھی۔
فلم بھوت بنگلہ میں اکشے کمار کے ساتھ تبو، پریش راول، راجپال یادو، وامیکا گبی اور مرحوم اداکار اسرا نی سمیت متعدد فنکار شامل ہیں۔ فلم 16 اپریل کو ریلیز کی جائے گی۔
