سال 2025 دنیا بھر میں قدرتی آفات کے حوالے سے انتہائی تباہ کن ثابت ہوا، جہاں 358 قدرتی آفات کے نتیجے میں 16 ہزار سے زائد افراد جاں بحق ہوئے، جبکہ 11 کروڑ سے زیادہ لوگ متاثر ہوئے۔
اعداد و شمار ایمرجنسی ایونٹس ڈیٹا بیس کی جانب سے جاری کیے گئے ہیں۔رپورٹ کے مطابق ان آفات سے عالمی معیشت کو 169.68 ارب ڈالر کا نقصان پہنچا۔
یہ بھی پڑھیے: قدرتی آفات سے بچاؤ کے لیے گوگل ڈیپ مائنڈ مددگار، جانیں کیسے؟
ایشیا سب سے زیادہ متاثرہ خطہ رہا، جہاں مجموعی اموات کا بڑا حصہ ریکارڈ کیا گیا۔ اس کی بڑی وجہ میانمار اور افغانستان میں آنے والے ہولناک زلزلے قرار دیے گئے ہیں۔
رپورٹ میں بتایا گیا کہ پاکستان بھی شدید متاثرہ ممالک میں شامل رہا۔ جون سے ستمبر 2025 کے دوران شدید مون سون بارشوں کے باعث آنے والے سیلاب سے 1,037 افراد جاں بحق ہوئے جبکہ 69 لاکھ افراد متاثر ہوئے۔
اسی طرح شام میں شدید خشک سالی نے 80 فیصد آبادی کو امداد کا محتاج بنا دیا، جبکہ امریکا میں پیلیسیڈاور ایٹن فائر دنیا کی مہنگی ترین جنگلاتی آگ میں شامل رہیں۔
یہ بھی پڑھیے: پنجاب: قدرتی آفات کے دوران انسانوں کو ریسکیو کرنے کے لیے پہلے ایئر لفٹ ڈرون کا آغاز
اعداد و شمار کے مطابق 2025 میں ایشیا میں 175 آفات ریکارڈ ہوئیں، جبکہ امریکا میں 93 اور افریقہ میں 63 قدرتی آفات پیش آئیں۔
رپورٹ میں کہا گیا ہے کہ موسمیاتی تبدیلیوں کے اثرات سے متعلق اعداد و شمار ابھی مکمل نہیں، اور خاص طور پر پاکستان، بھارت اور یورپ میں ہیٹ ویو سے ہونے والی اموات بعد میں مزید بڑھ سکتی ہیں۔
