حکومت پنجاب نے ٹریفک جرمانوں میں ہوش ربا اضافے والا آرڈیننس واپس لے لیا ہے۔ اب نیا صوبائی موٹر وہیکل 2025 آرڈیننس میں جرمانوں کی کمی کا ترمیمی بل تیار کر لیا گیا ہے، جس کی قائمہ کمیٹی نے منظوری بھی دے دی ہے۔
یہ بھی پڑھیں:“قسطوں پر لیے گئے موٹرسائیکلوں پر ایم ٹیگ لگا نہیں رہے، پولیس چالان کرتی جا رہی ہے”
محکمہ داخلہ نے کابینہ کی منظوری کے بعد قائمہ کمیٹی میں جرمانوں میں کمی کی تجاویز پیش کیں۔ کمیٹی کے 41ویں اجلاس کی تیسری نشست میں ترمیم شدہ آرڈیننس کو ایوان میں پیش کرنے کا معاملہ زیر بحث آیا، تاہم اسے حتمی منظوری کے لیے اسمبلی میں نہیں لایا جا سکا۔ کمیٹی نے محکمہ داخلہ کی بریفنگ سننے کے بعد ترامیم کی منظوری دے دی ہے۔
پچھلے آرڈیننس کے ذریعے ٹریفک جرمانوں میں بے تحاشہ اضافہ کیا گیا تھا، جس سے عام شہریوں، موٹر سائیکل سواروں، رکشہ چلانے والوں اور چھوٹے بڑے گاڑی مالکان کو شدید مشکلات کا سامنا کرنا پڑ رہا تھا۔
اب آرڈیننس میں کیا تبدیلیاں کی گئیں؟
قائمہ کمیٹی میں منظور ہونے والی ترامیم کے تحت جرمانوں میں نمایاں کمی کی گئی ہے۔ موٹر سائیکل کی کچھ عام خلاف ورزیوں پر جرمانہ 2 ہزار سے کم کر کے 1 ہزاروپے کر دیا گیا۔ موٹر سائیکل کی زیادہ سے زیادہ جرمانہ اب 2 ہزار روپے رہے گا۔ رکشہ چند خلاف ورزیوں پر جرمانہ 3 ہزار سے کم کر کے 1 ہزار روپے کر دیا گیا۔ سنگین خلاف ورزی پر 2 ہزار روپے جرمانہ ہوگا۔
کار اور جیپ کی خلاف ورزیوں پر جرمانہ 5 ہزار سے کم کر کے 3 ہزار روپے کر دیا گیا ہے۔ سنگین خلاف ورزیوں پر 5 ہزار روپے جرمانہ برقرار رکھا گیا۔ اوور سپیڈنگ موٹر سائیکل، رکشہ اور کار کے اوور سپیڈنگ جرمانے برقرارکھے گئے ہیں۔
2000 سی سی اور لگژری گاڑیاں پرجرمانہ 20 ہزار سے کم کر کے 10 ہزار روپے کر دیا گیا۔ اب کم از کم 2 ہزار اور زیادہ سے زیادہ 10 ہزار روپے جرمانہ ہوگا۔ مزدا، کوسٹرز، چھوٹی مسافر وینز اور لائٹ گاڑیاں پر جرمانہ 20 ہزار سے کم کر کے 7 ہزار روپے کر دیا گیا۔
یہ بھی پڑھیں:پنجاب اسمبلی: ناجائز چالانوں، سی سی ڈی اور سیاسی انتقام کے خلاف اپوزیشن کی حکومت پر تنقید
ٹرک، بس اور ہیوی گاڑیاں زیادہ سے زیادہ جرمانہ 20 ہزار سے کم کر کے 10 ہزار روپے کر دیا گیا۔ حکومت کا کہنا ہے کہ یہ ترامیم عام شہریوں کو ریلیف دینے کے لیے کی گئی ہیں۔ آرڈیننس کی اسمبلی سے حتمی منظوری کے بعد جرمانوں میں کمی کا اطلاق فوری طور پر ہو جائے گا۔
محکمہ داخلہ کے مطابق نئی ترامیم سے شہریوں پر بوجھ کم ہوگا جبکہ ٹریفک قوانین کی سنگین خلاف ورزیوں پر سختی برقرار رہے گی۔ بل جلد اسمبلی اجلاس میں پیش کی جائیں گی۔
