ایرانی حکومت نے تمام تر سفارتی اور فوجی تناؤ کے باوجود اپنی قومی فٹبال ٹیم کو امریکا میں منعقد ہونے والے فیفا ورلڈ کپ 2026 میں شرکت کے لیے مکمل طور پر تیار قرار دے دیا ہے۔
یہ بھی پڑھیں: ایران فٹبال ورلڈ کپ 2026 میں شرکت نہیں کرے گا، ایرانی وزیر کھیل
ایرانی حکومت کی ترجمان فاطمہ مہاجرانی نے بدھ کے روز سرکاری میڈیا پر گفتگو کرتے ہوئے واضح کیا کہ وزارت کھیل و نوجوانان نے ورلڈ کپ کے لیے تمام ضروری انتظامات مکمل کر لیے ہیں اور ٹیم کو ہر ممکن سہولیات فراہم کی جا رہی ہیں تاکہ وہ اس عالمی ایونٹ میں بہترین کارکردگی کا مظاہرہ کرسکے۔
یہ اعلان ایک ایسے حساس وقت میں سامنے آیا ہے جب ایران اور امریکا کے درمیان حالیہ مہینوں میں براہِ راست فوجی تصادم اور مشرقِ وسطیٰ میں کشیدگی کی وجہ سے تعلقات انتہائی کشیدہ ہیں۔
Iran says its national team is fully prepared for the 2026 FIFA World Cup in the US, insisting all arrangements are in place despite regional conflict and political tensions surrounding its participationhttps://t.co/YeaO1TC7tp
— TRT World (@trtworld) April 22, 2026
ایرانی ترجمان نے اس صورتحال کو ’تیسری مسلط کردہ جنگ‘ سے تعبیر کیا ہے، تاہم ان کا کہنا ہے کہ کھیل کے میدان میں ایران اپنے ملک کی بھرپور نمائندگی کرے گا۔ فیفا کے صدر جیانی انفینٹینو نے بھی چند روز قبل اس بات کی تصدیق کی تھی کہ ایران نے ورلڈ کپ کے لیے کوالیفائی کر لیا ہے اور وہ اس ٹورنامنٹ میں شرکت کا ارادہ رکھتا ہے۔
واضح رہے کہ ورلڈ کپ 11 جون سے 19 جولائی 2026 تک امریکا، کینیڈا اور میکسیکو میں منعقد ہوگا، جس میں ایران کی یہ مجموعی طور پر ساتویں شرکت ہوگی۔
یہ بھی پڑھیں: قومی ترانہ نہ گانے کا معاملہ، ایرانی ویمنز فٹبال ٹیم کے 7 ارکان نے آسٹریلیا میں پناہ لے لی
اگرچہ امریکی صدر ڈونلڈ ٹرمپ نے ایرانی ٹیم کی آمد کے حوالے سے سیکیورٹی تحفظات کا ذکر کیا تھا، لیکن ایران کا موقف ہے کہ ان کی ٹیم قومی فخر کے ساتھ میدان میں اترے گی۔
پاکستان کی ثالثی میں ہونے والی حالیہ جنگ بندی نے ان سفارتی کوششوں کو مزید تقویت دی ہے جس کے باعث اس میگا ایونٹ میں ایران کی شرکت اب یقینی دکھائی دے رہی ہے۔
