نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسیز آپریشن سینٹر نے ملک بھر میں الرٹ جاری کرتے ہوئے خبردار کیا ہے کہ مختلف علاقوں میں 5 مئی تک شدید گرمی کی لہر (ہیٹ ویو) جاری رہنے کا امکان ہے۔
یہ بھی پڑھیں: شمالی علاقوں میں ہیٹ ویو اور گلشیئر پگھلنے سے مارچ تا ستمبر سیلاب کا خطرہ، این ڈی ایم اے
اتھارٹی کے مطابق 24 اپریل سے 29 اپریل کے دوران ملک کے بعض حصوں میں بارش، گرد آلود ہوائیں اور گرج چمک کے ساتھ طوفان بھی متوقع ہیں۔
این ڈی ایم اے نے شہریوں اور متعلقہ اداروں کو احتیاطی اقدامات اور ہنگامی تیاریوں کی ہدایت کی ہے۔
شدید گرمی کن علاقوں میں ہوگی؟
این ڈی ایم اے کے مطابق سندھ، جنوبی پنجاب اور بلوچستان کے کئی علاقے شدید ہیٹ ویو کی لپیٹ میں رہیں گے۔
کراچی، حیدرآباد، سکھر، لاڑکانہ، جیکب آباد، بہاولپور، رحیم یار خان، ملتان اور تربت جیسے بڑے شہروں میں شدید گرمی متوقع ہے۔
علاوہ ازیں وسطی پنجاب اور خیبر پختونخوا کے بعض علاقوں میں بھی درجہ حرارت میں نمایاں اضافہ ہوگا۔
بارش اور آندھی کا امکان
24، 25 اور 29 اپریل کو پنجاب کے بالائی اور وسطی علاقوں میں گرد آلود ہوائیں، تیز ہوا اور بارش کا امکان ہے۔
مزید پڑھیے: کراچی میں بارشوں کا 40 سالہ ریکارڈ ٹوٹ گیا، ملک کے بیشتر علاقوں میں مزید بارشیں متوقع
اسلام آباد، راولپنڈی، لاہور، فیصل آباد، گوجرانوالہ اور دیگر اضلاع متاثر ہو سکتے ہیں۔
بلوچستان کے شمالی اضلاع جیسے کوئٹہ، زیارت، خضدار اور قلات میں بھی بارش اور تیز ہوائیں متوقع ہیں جبکہ ساحلی علاقے گرم اور خشک رہیں گے۔
خیبر پختونخوا، گلگت بلتستان اور آزاد کشمیر میں بھی وقفے وقفے سے بارش اور گرج چمک کا امکان ظاہر کیا گیا ہے۔
احتیاطی ہدایات
این ڈی ایم اے نے خبردار کیا ہے کہ شدید گرمی کے باعث ہیٹ اسٹروک، پانی کی کمی اور دیگر صحت کے مسائل پیدا ہو سکتے ہیں۔ شہریوں کو ہدایت کی گئی ہے کہ غیر ضروری طور پر دھوپ میں نکلنے سے گریز کریں، زیادہ پانی پییں اور احتیاطی تدابیر اختیار کریں۔
اتھارٹی نے متعلقہ اداروں کو ہدایت کی ہے کہ ہیٹ ویو رسپانس پلان فوری فعال کریں، کولنگ سینٹرز قائم کریں اور اسپتالوں کو الرٹ رکھیں۔
مزید پڑھیں: پاکستان کا موسم: بیشتر علاقوں میں درجہ حرارت میں اضافہ، بعض علاقوں میں ہلکی بارش کا امکان
صوبائی اور ضلعی انتظامیہ کو بھی کسی بھی ہنگامی صورتحال سے نمٹنے کے لیے مکمل چوکس رہنے کی ہدایت دی گئی ہے۔
