وفاقی وزیر اطلاعات و نشریات عطا اللہ تارڑ نے سندھ کے ضلع خیرپور سے تعلق رکھنے والے ایک تعلیم یافتہ شہری اظہر میمن کو اسلام آباد مدعو کر کے ان سے ملاقات کی اور انہیں ملازمت فراہم کرنے کی یقین دہانی کرائی ہے۔
اظہر میمن نے میڈیا سے گفتگو کرتے ہوئے بتایا کہ وفاقی وزیر نے انہیں نہایت عزت و احترام کے ساتھ اسلام آباد بلایا اور پہلی مرتبہ ہوائی جہاز کے سفر کا موقع فراہم کیا۔ ان کے مطابق ملاقات کے دوران انہیں ایک موبائل فون بطور تحفہ بھی دیا گیا اور مجھے نوکری بھی دی ہے۔
سندھی میں بتا رہے کہ وفاقی وزیر اطلاعات نے مجھے بلاکر کتنی عزت دی،جہاز میں بلوایا اور میں نے پہلی بار جہاز کا سفر کیا ،مجگے موبائل گفٹ کیا پھر مجھے جاب دی،کوئی چھوٹے موٹے وزیر نہیں ہیں وہ ،پی ایم ایل این کے فاؤنڈر نواز شریف کے قریبی ساتھی ہیں ،میں ان کا بہت زیادہ شکر گزار ہوں pic.twitter.com/BHXWxk6QuX
— شبانہ شوکت (@Shabanashaukat4) April 29, 2026
اظہر میمن کا کہنا تھا کہ وہ وفاقی وزیر کے اس اقدام پر بے حد شکر گزار ہیں وہ کوئی چھوٹے موٹے وزیر نہیں ہیں وہ نواز شریف کے قریبی ساتھی ہیں۔
واضح رہے کہ عطا تارڑ نے گزشتہ روز سماجی رابطے کی ویب سائٹ ایکس پر اظہر میمن سے ملاقات کی ایک ویڈیو بھی شیئر کی، جس میں انہوں نے شہری کو اپنی نشست پر بٹھایا۔ اس موقع پر جذباتی مناظر دیکھنے میں آئے اور نوجوان اپنے احساسات پر قابو نہ رکھ سکا۔ ویڈیو میں وہ جذباتی ہوتے ہوئے کہتا ہے کہ یہ لمحات اس کے لیے انتہائی خاص ہیں۔
یہ بھی پڑھیں: سوشل میڈیا پر وائرل ویڈیو کے بعد وفاقی وزیر عطا تارڑ کی خیرپور کے نوجوان سے ملاقات، ملازمت کی یقین دہانی
اپنے پیغام میں عطا تارڑ نے لکھا کہ اظہر میمن سے ملاقات ایک نہایت جذباتی اور متاثر کن لمحہ تھا۔ ان کے مطابق چند روز قبل اظہر میمن کی ایک ویڈیو سوشل میڈیا پر وائرل ہوئی تھی، جس میں انہوں نے اپنی زندگی کے مشکل حالات اور جدوجہد کا احوال بیان کیا تھا۔ اظہر میمن نے کراچی یونیورسٹی سے ایم بی اے کی ڈگری حاصل کر رکھی ہے۔
