وفاقی آئینی عدالت نے شوگر ملز کو ایکسپورٹ سبسڈی کی فراہمی سے متعلق اہم مقدمے کی سماعت کے لیے 7 مئی کی تاریخ مقرر کر دی ہے۔
اس سلسلے میں جسٹس عامر فاروق کی سربراہی میں 2 رکنی بینچ تشکیل دے دیا گیا ہے، جو شوگر ملز کی جانب سے دائر اپیلوں کی سماعت کرے گا۔
یہ معاملہ اس وقت سامنے آیا جب سندھ ہائیکورٹ نے شوگر ملز کی درخواستیں مسترد کرتے ہوئے قرار دیا تھا کہ ایکسپورٹ سبسڈی دینا حکومتی پالیسی کا معاملہ ہے۔
یہ پڑھیں: سبسڈی کا فائدہ عوام تک پہنچانے کے لیے فوری اقدامات کیے جائیں، اسحاق ڈار کی ہدایت
عدالت نے مزید کہا تھا کہ ایکسپورٹ سبسڈی شوگر ملز سمیت کسی کا کوئی بنیادی حق نہیں جس کے اجرا کا عدالت حکم دے سکے۔
عدالت نے اپنے فیصلے میں واضح کیا تھا کہ سبسڈی کی منظوری یا عدم منظوری انتظامی اختیار کے دائرہ کار میں آتی ہے۔
دوسری جانب اقتصادی رابطہ کمیٹی پہلے ہی شوگر ملز کو ایکسپورٹ سبسڈی دینے کی منظوری دے چکی تھی، جس کے بعد شوگر ملز نے سبسڈی کے حصول کے لیے آئینی عدالت سے رجوع کیا۔
مزید پڑھیں: کیا چینی مل مالکان کے غیرمعمولی منافع پر ونڈ فال ٹیکس عائد کیا جاسکے گا؟
مجموعی طور پر 15 شوگر ملز نے سندھ ہائیکورٹ کے فیصلے کو چیلنج کرتے ہوئے اپیلیں دائر کی ہیں۔
اب وفاقی آئینی عدالت میں ہونے والی آئندہ سماعت اس بات کا تعین کرے گی کہ آیا سبسڈی کے اجرا سے متعلق حکومتی پالیسی کو عدالتی جانچ کے دائرے میں لایا جا سکتا ہے یا نہیں۔
اس کیس کے فیصلے کے ملکی صنعتی اور برآمدی شعبے پر اہم اثرات متوقع ہیں۔
